Túrkistan oblysy Maqtaaral aýdanynyń eki aýylyn sý basty, - dep habarlaidy óńirlik kommýnikatsiialar qyzmeti.
Búgin, 2 mamyr tańǵy saǵat 04:30-da Maqtaaral aýdanynyń shekarasyndaǵy Ortalyq dalalyq kollektorynan (ótkizý qýaty - sekýndyna 120 tekshe metr) sý tógilip, Jeńis jáne Jańa turmys aýyldaryn sý alyp ketken.
«Sondai-aq oblystyq mándegi «Myrzakent - Jeńis - Jańa turmys» tasjolyn sý basqan. Kólik júrýi múmkin emes» delingen habarlamada.
Qazirgi tańda apattyq-qutqarý jumystary júrip jatyr.
Aita keteiik, buǵan deiin Jańa turmys, Jeńis, Nurly jol eldi mekenderiniń turǵyndary aýdan ortalyǵy Myrzakentte ornalasqan Myrzakent mektep-gimnaziiasyna (600 oryn), S.Rahymov atyndaǵy jalpy orta mektebine (700 oryn), Pýshkin (400 oryn), Abylaihan orta mektepterine (500 oryn) evakýatsiialanyp, oǵan 6 avtobýs jumyldyrylǵan bolatyn.
Maqtaaral aýdanynyń ákimi, aýdandyq tótenshe jaǵdai shtabynyń tóraǵasy Baqyt Asanovtyń tóraǵalyǵymen 2 mamyr túngi 00:00-de arnaiy jiyn ótip, tótenshe jaǵdai jariialaý jóninde tapsyrma berildi.
Eske sala keteiik, keshe Ózbekstanda Sardoba sý qoimasynyń bógeti jarylyp, eldi mekender, kommýnikatsiialyq jeliler men egistikterge zaqym kelgen bolatyn.
