Foto: Gov.kz.
Maqtaaral aýdanynda 2024 jyldyń 10 aiynda jalpy óńirlik ónim kólemi 107 mlrd teńgeni quraǵan. Onyń ishinde, aýyl sharýashylyǵynda - 76,5 mlrd teńge, qurylys salasynda - 8 mlrd 39 mln teńge, ónerkásipte - 10,9 mlrd teńge, saýda kólemi - 10,8 mlrd teńgeni qurady. Budan bólek, negizgi kapitalǵa tartylǵan investitsiia kólemi 32,1 mlrd teńgeni qurap, ótken jylmen salystyrǵanda 120,6%-ǵa oryndalǵan. Bul jaiynda Maqtaaral aýdanynyń ákimi Baqyt Asanov BAQ ókilderimen ótken brifingte málimdedi.
«Biyl Maqtaaraldyq diqandar 60,6 myń gektar jerge egistik ekse, onyń 33,7 myń gektary maqta daqylyna tiesili. Jalpy aýdan boiynsha 90,4 myń tonna aq altyn jinalyp, ortasha ónimdilik 26,8 tsentnerdi qurady. Maqtaaral aýdany boiynsha 2024-2030 jyldarǵa jalpy quny 94,1 mlrd teńgege 53 investitsiialyq jobany iske asyrý josparlanýda. Onyń ishinde, maqta-toqyma klasterin damytýda jalpy quny 70 mlrd teńgeni quraityn 8 iri joba júzege asyrylmaq. Nátijesinde 3 020 adam jumyspen qamtylady. Tarqata aitsam, «Cotton Maqta» JShS tarapynan 2025-2026 jyldar aralyǵynda jyldyq qýattylyǵy 10 myń tonna bolatyn jip iirý fabrikasy salynady. Sonymen qatar, «Global Textile Turkestan» JShS tarapynan 13,8 myń tonna jaima óńdeý fabrikasyn salý kózdelgen. «Tulpar textile» JShS tarapynan da 2025-2028 jyldary 5 myń tonna jip iiretin fabrika salynbaq. Sonymen birge, «Nurbibi» JShS maqta óńdeý zaýytyn, «Begash» JShS tuqym, tamshylatyp sýǵarý taspasyn óndirý jáne «Zhybek TextilE» JShS jibek óndirý fabrikalaryn iske asyrýǵa nietti»,- dedi Baqyt Nasyrhanuly.
Spikerdiń sózinshe, aýdandaǵy Úlgili eldi mekeninde «Jaily mektep» pilottyq ulttyq jobasy aiasynda salynyp jatqan 600 oryndyq mektep jyl sońynda paidalanýǵa beriledi. Al, Atakent kentindegi 1500 oryndyq mekteptiń qurylys jumystary 2025 jylǵa ótpeli. Sonymen qatar aýdandaǵy halyqtyń áleýmettik osal toptary úshin jalǵa beriletin 87 turǵyn úi kezekte turǵan otbasylarǵa jyl sońynda tabystalmaq.
Budan bólek, «Aýyldyq densaýlyq saqtaýdy jańǵyrtý» ulttyq jobasy aiasynda 5 meditsinalyq nysannyń qurylys jumystar júrgizilip jatyr.
Aita keteiik, Maqtaaral aýdanyndaǵy barlyq 68 eldi meken 100% ortalyqtandyrylǵan aýyz sýmen qamtylǵan. Sondai-aq, 68 eldi mekenniń 45-i tabiǵi gazben qamtylǵan, bul aýdandaǵy eldi mekenderdiń jalpy sanynyń 66,1%-yn quraidy. Budan bólek, aýdanda «Aýyl – El Besigi» baǵdarlamasy aiasynda 10 aida 20,7 shaqyrymdy quraityn 22 kósheniń ishki kóshelerine ortasha jóndeý jumystary júrgizilgen.
