QR Ishki ister ministrligi óńirlerdegi vedomstvolyq mekemelerinen Túrkistan oblysynyń Maqtaaral aýdanyna qosymsha kúsh tartyp, tótenshe jaǵdai saldaryn joiýǵa jumyldyrýda. Bul týraly QR IIM Tótenshe jaǵdailar komiteti habarlady.
5 mamyr kúni Shymkent qalasy, Jambyl jáne Qyzylorda oblystarynyń Tótenshe jaǵdailar departamentterinen barlyǵy 116 adam, 58 tehnika, júzý quraldary jáne motopompalar tótenshe jaǵdai saldaryn joiý úshin Túrkistan oblysyna keldi.
6 mamyr kúnitańerteń Shymkent qalasy men Túrkistan oblystyq TJD-nyń jeke quramymen birge, 6 tirkemeli motopompa qosymsha jiberildi.
Budan bólek, Almaty qalasynan Ulttyq ulan áskeri bóliminiń kúshteri men quraldary (160 adam, 15 birlik tehnika) túnde Shymkent qalasyna jetip, qazir oqiǵa ornyna bara jatyr.
Osylaisha,QR IIM-niń tótenshe jaǵdai oryndaryna jumyldyrylǵan kúshteri men quraldarynyń jalpy sany: 335 adam, 112 tehnika, júzý quraldary men motopompany qurady.
«5 mamyrda keshke Shymkent qalasynan, Qyzylorda jáne Jambyl oblystarynan kelip jetken TJK kúshteri men quraldary qutqarýshylardy ornalastyrý úshin lager ornatty. Ótken táýlikte kelip jetken Jambyl, Qyzylorda oblystary men Shymkent qalasy TJD kúshteri 2 mln. jýyq tekshe metr sýdy soryp shyǵardy. Qoǵaly, Nurly jol, Ferdoýsi, Yrysty, Qaraqyr, Órgebas eldi mekenderinde uzyndyǵy 15 shaqyrym bógetti nyǵaityp, 85600 qum salynǵan qap tósedi. Qosymsha tartylǵan injenerlik tehnika Myrzakent kentinde shatyrly qalashyqta ornalasqan. Árbir 2 saǵat saiyn sý deńgeiine monitoring júrgiziledi, ol jedel shtabtyń turaqty baqylaýynda. Sý basqan ýchaskeler men qaýipti eldi mekender aimaqtarynyń ahýaldyq kartasy ázirlendi», - dedi Tótenshe jaǵdai komitetinen.
Jedel shtab Myrzakent eldi mekeninde aýdandyq ákimdik ǵimaratynda ornalasqan. Shtabta QR IIM TJK jáne Ulttyq ulannyń, QR Ulttyq qaýipsizdik komiteti Shekara qyzmeti, Túrkistan oblysynyń TJD, Túrkistan oblysynyń Politsiia departamentiniń ókilderi jumys isteýde.
Sondai-aq málim etilgendei, apattyq-qutqarý jáne kezek kúttirmeitin jumystardy júrgizý úshin QR Ishki ister, Qorǵanys ministrlikteriniń jáne jergilikti atqarýshy organdardan barlyǵy 986 adam, 180 tehnika men 4 júzý quraly jumyldyryldy. Joiý jumystaryna qutqarýshylar, politsiia qyzmetkerleri, áskeri qyzmetshiler, jergilikti atqarýshy organdardyń qyzmetkerleri, eriktiler qatysýda.
