Qasym-Jomart Toqaevtyń atyna Táýelsizdik kúnine orai shet memleketter men halyqaralyq uiym basshylarynan quttyqtaýlar tolassyz kelip jatyr, dep habarlaidy Aqorda.
Frantsiia Prezidenti Emmaniýel Makron elimizdi Táýelsizdik kúnimen quttyqtap, Qazaqstannyń ósip-órkendei berýin tilegen.
– Biylǵy jyl bizdiń elderimizdiń bir-birine jaqyndai túsýimen erekshelendi. Men buǵan óte rizamyn. Eýropa Odaǵy men Qazaqstan arasyndaǵy Keńeitilgen yntymaqtastyq jáne seriktestik týraly kelisim 2020 jyldyń 1 naýryzynan bastap óz kúshine endi, – dep jazady Frantsiia Prezidenti. Sondai-aq ol Qazaqstannyń biyl ólim jazasyn joiýdy kózdeitin Azamattyq jáne saiasi quqyqtar týraly halyqaralyq Paktiniń ekinshi fakýltativti hattamasyna qol qoiǵanyn, ekonomika salasyndaǵy yntymaqtastyq jónindegi jol kartasy boiynsha jańa jobalar pandemiianyń kesirinen keiinge shegerilgenimen, onyń iske asyrylýyna qatysty jumystar jalǵasyp jatqanyn atap ótken. Sonymen qatar Emmaniýel Makron óz quttyqtaý hatynda Nur-Sultan qalasynda frantsýz bilim berý mekemesin ashýǵa bailanysty jobada ilgerileý bar ekenin jazǵan.
Ázerbaijan Prezidenti Ilham Áliev te Táýelsizdik kúnimen quttyqtap, júrekjardy tilegin joldady.
– Qazaqstan Respýblikasynyń memlekettiligin nyǵaityp jáne halqynyń ál-aýqatyn jaqsartyp, áleýmettik-ekonomikalyq, mádeniet salalary boiynsha damýy, sondai-aq, elińizdiń halyqaralyq arenada abyroiynyń artýy bizdi qýantady. Bizdiń birlesken kúsh-jigerimizdiń arqasynda Ázerbaijan men Qazaqstan arasyndaǵy dostyq pen yntymaqtastyq óristep, bizdiń strategiialyq áriptestigimiz moraldik qundylyqtary men dástúri ortaq halqymyzdyń erkine sáikes odan ári dami beredi dep senemin, – delingen quttyqtaý hatta.
Belarýs Respýblikasynyń Prezidenti Aleksandr Lýkashenko óziniń quttyqtaý hatynda egemendik jyldary Qazaqstannyń áleýmettik-ekonomikalyq jáne gýmanitarlyq salalar boiynsha aitarlyqtai damyǵanyn, halyqaralyq qoǵamdastyq tarapynan moiyndalǵanyn atap ótken.
– Belarýs Qazaqstanmen aradaǵy jyldan-jylǵa nyǵaiyp, jetildirilip, jańa mazmunǵa ie bolyp kele jatqan berik seriktestik bailanystardy shyn máninde joǵary baǵalaidy. Memleketterimiz arasynda qalyptasqan ózara senim, qoldaý men ashyqtyq qazirgi zamanǵy kúrdeli syn-qaterlerge birge qarsy turýǵa, belarýs-qazaq halyqtarynyń igiligi jolyndaǵy kópjaqty jáne tiimdi yntymaqtastyqty keńeitýge múmkindik beretinine senimdimin, – delingen Aleksandr Lýkashenkonyń hatynda.
Armeniia Prezidenti Armen Sarkisian Qasym-Jomart Toqaevtyń atyna joldaǵan quttyqtaý hatynda Memleket basshysynyń qyzmetine tabys, Qazaqstan halqyna beibitshilik, baq-bereke tilei otyryp: «Armeniia Respýblikasy men Qazaqstan Respýblikasynyń arasyndaǵy ózara senim men qoldaýǵa negizdelgen yntymaqtastyqtyń eki halyqtyń igiligi úshin odan ári dami beretinine nyq senimdimin», – dep jazǵan.
Armeniia Premer-Ministri Nikol Pashinian Qazaqstan táýelsizdigin jariialaǵan kezden beri halyqaralyq arenadaǵy ornyn tabysty nyǵaityp, saiasi jáne áleýmettik-ekonomikalyq salalarda aitarlyqtai jetistikke jetkenin aitqan.
– Armeniia men Qazaqstannyń dostyq qatynastary eki halyqtyń múddesi úshin ekijaqty formatta da, halyqaralyq uiymdar men integratsiialyq birlestikter aiasynda da odan ári dami beredi dep senemin, – delingen jedelhatta.
Sonymen qatar Qazaqstannyń Táýelsizdik kúnine orai Memleket basshysy men Qazaqstan halqyn TMD Atqarý komitetiniń tóraǵasy – Atqarýshy hatshysy Sergei Lebedev, Resei Federatsiiasy Syrtqy barlaý qyzmetiniń direktory Sergei Naryshkin quttyqtap, baq-bereke tilegen.
