Buqaralyq aqparat quraldaryn qoldaý qorynyń jetekshisi, Astana Media Week media aptalyǵynyń uiymdastyrýshysy Mahabbat Esen teledidardyń bolashaǵyna qatysty pikir bildirdi, dep habarlaidy QazAqparat.
Áýeli Mahabbat Esen osymen úshinshi jyl qatar ótip jatqan Astana Media Week media aptalyǵy biyl nesimen erekshelengenin aitty.
«Birinshi jyly barlyq arnalardy, mediatorlardy, óndirýshilerdi biriktiretin kommýnikativtik alań qurý kózdegen edik. Árine, alǵy shepte televiziia salasynyń ókilderi turdy. Solar úshin osyndai pikir almasý alańyn qurǵymyz kelgen bolatyn. Alǵashynda osyndai alań quryp, adamdardy aqparattandyrý, úiretý maqsat etilse, ótken jyly memleket qarajatyna jasalǵan barlyq kontent óńirlik arnalarǵa tegin berildi», - dedi Mahabbat Esen.
Onyń aitýyna qaraǵanda, bul jolǵy sharada aqparatty sol kúiinde qabyldaityn «sezimtal toptarmen» jumys tásili negizgi taqyryp bolǵanyn aitady.
«Biylǵy aptalyqtyń mazmuny erekshe. Qatyp qalǵan eshteńe joq qoi. Búkil álem talqylap jatqan jańalyqtardan qur qalmai, baǵyp otyratyn boldyq. Aqparat tutynýshylardyń talaby men talǵamy qandai degen másele ózekti bolyp tur. Aqparat óte kóp jáne bul eldi sharshatady. Mediamádeniet, mediasaýattylyq degen dúnieler bizdiń qoǵamda qatty damyp ketti dep aitýǵa kelmeidi», - degen ol dástúrli sanalatyn BAQ pen zamanaýi aqparat berý formatynyń arasyndaǵy báseke týraly pikir bildirdi.
«Bul aptalyqta árkimniń pikirin estý mańyzdy boldy. «Teledidardy internet ysyryp tastai ala ma?» degen suraq áli bar. Aptalyqqa qatysýshylar televiziia salasyna ázirge eshqandai jamandyq tónip turǵan joq degen paiymǵa kelip jatyr. Sondyqtan, osy tóńirektegi daýdy doǵaratyn kez jetken siiaqty. Tipti bul taqyryp sánnen qalǵan. Múmkin teledidar aqparat naryǵynda osydan 30-40 jyl burynǵydai qojalyq ete almas, biraq ol búgin aqparatty tikelei taratýdyń teńdessiz alańyna ainalyp otyr. Qazir BAQ tiimdiligi kontentpen ólshenedi. Iaǵni kórsetilim alańynyń qurylymy mańyzdy emes. Teledidar ma, YouTube kanaly ma, áleýmettik jeli me, ol mańyzdy emes. Eń mańyzdysy – mazmun. Sapaly jýrnalistika eshqashan ólmeidi», - deidi tanymal jýrnalist.
