بۇقارالىق اقپارات قۇرالدارىن قولداۋ قورىنىڭ جەتەكشٸسٸ, Astana Media Week مەديا اپتالىعىنىڭ ۇيىمداستىرۋشىسى ماحاببات ەسەن تەلەديداردىڭ بولاشاعىنا قاتىستى پٸكٸر بٸلدٸردٸ, دەپ حابارلايدى قازاقپارات.
ەۋەلٸ ماحاببات ەسەن وسىمەن ٷشٸنشٸ جىل قاتار ٶتٸپ جاتقان Astana Media Week مەديا اپتالىعى بيىل نەسٸمەن ەرەكشەلەنگەنٸن ايتتى.
«بٸرٸنشٸ جىلى بارلىق ارنالاردى, مەدياتورلاردى, ٶندٸرۋشٸلەردٸ بٸرٸكتٸرەتٸن كوممۋنيكاتيۆتٸك الاڭ قۇرۋ كٶزدەگەن ەدٸك. ەرينە, العى شەپتە تەلەۆيزييا سالاسىنىڭ ٶكٸلدەرٸ تۇردى. سولار ٷشٸن وسىنداي پٸكٸر الماسۋ الاڭىن قۇرعىمىز كەلگەن بولاتىن. العاشىندا وسىنداي الاڭ قۇرىپ, ادامداردى اقپاراتتاندىرۋ, ٷيرەتۋ ماقسات ەتٸلسە, ٶتكەن جىلى مەملەكەت قاراجاتىنا جاسالعان بارلىق كونتەنت ٶڭٸرلٸك ارنالارعا تەگٸن بەرٸلدٸ», - دەدٸ ماحاببات ەسەن.
ونىڭ ايتۋىنا قاراعاندا, بۇل جولعى شارادا اقپاراتتى سول كٷيٸندە قابىلدايتىن «سەزٸمتال توپتارمەن» جۇمىس تەسٸلٸ نەگٸزگٸ تاقىرىپ بولعانىن ايتادى.
«بيىلعى اپتالىقتىڭ مازمۇنى ەرەكشە. قاتىپ قالعان ەشتەڭە جوق قوي. بٷكٸل ەلەم تالقىلاپ جاتقان جاڭالىقتاردان قۇر قالماي, باعىپ وتىراتىن بولدىق. اقپارات تۇتىنۋشىلاردىڭ تالابى مەن تالعامى قانداي دەگەن مەسەلە ٶزەكتٸ بولىپ تۇر. اقپارات ٶتە كٶپ جەنە بۇل ەلدٸ شارشاتادى. مەديامەدەنيەت, مەدياساۋاتتىلىق دەگەن دٷنيەلەر بٸزدٸڭ قوعامدا قاتتى دامىپ كەتتٸ دەپ ايتۋعا كەلمەيدٸ», - دەگەن ول دەستٷرلٸ سانالاتىن باق پەن زاماناۋي اقپارات بەرۋ فورماتىنىڭ اراسىنداعى بەسەكە تۋرالى پٸكٸر بٸلدٸردٸ.
«بۇل اپتالىقتا ەركٸمنٸڭ پٸكٸرٸن ەستۋ ماڭىزدى بولدى. «تەلەديداردى ينتەرنەت ىسىرىپ تاستاي الا ما?» دەگەن سۇراق ەلٸ بار. اپتالىققا قاتىسۋشىلار تەلەۆيزييا سالاسىنا ەزٸرگە ەشقانداي جاماندىق تٶنٸپ تۇرعان جوق دەگەن پايىمعا كەلٸپ جاتىر. سوندىقتان, وسى تٶڭٸرەكتەگٸ داۋدى دوعاراتىن كەز جەتكەن سيياقتى. تٸپتٸ بۇل تاقىرىپ سەننەن قالعان. مٷمكٸن تەلەديدار اقپارات نارىعىندا وسىدان 30-40 جىل بۇرىنعىداي قوجالىق ەتە الماس, بٸراق ول بٷگٸن اقپاراتتى تٸكەلەي تاراتۋدىڭ تەڭدەسسٸز الاڭىنا اينالىپ وتىر. قازٸر باق تيٸمدٸلٸگٸ كونتەنتپەن ٶلشەنەدٸ. ياعني كٶرسەتٸلٸم الاڭىنىڭ قۇرىلىمى ماڭىزدى ەمەس. تەلەديدار ما, YouTube كانالى ما, ەلەۋمەتتٸك جەلٸ مە, ول ماڭىزدى ەمەس. ەڭ ماڭىزدىسى – مازمۇن. ساپالى جۋرناليستيكا ەشقاشان ٶلمەيدٸ», - دەيدٸ تانىمال جۋرناليست.
