Taldyqorǵan qalasyndaǵy Til saraiynda «Memleket basshysynyń «Bolashaqqa baǵdar: rýhani jańǵyrý» atty maqalasy» - azamattardy biriktirýdiń mańyzdy faktory» atty «dóńgelek ústel» otyrysy ótti. Oǵan oblys ákimi A. Batalov, QR Parlamenti Májilisiniń vitse-spikeri, Qazaqstannyń orys, slavian jáne kazak uiymdary birlestiginiń tóraǵasy Vladimir Bojko qatysty, dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Ult kóshbasshysynyń baǵdarlamalyq maqalasynyń negizgi aspektilerin jergilikti deńgeide ultaralyq qatynastar saiasatyn júzege asyrý arqyly oryndaý sharanyń basty taqyryby boldy. Sonymen qatar biylǵy jyly qurylǵanyna 25 jyl tolyp otyrǵan oblystyq orys ortalyǵynyń ishki saiasi turaqtylyqty nyǵaitýǵa qosyp otyrǵan úlesi de atap ótildi.
- Baǵdarlamalyq maqaladaǵy mindetterdi júzege asyrý maqsatynda oblysta arnaiy komissiia qurylǵan. Onyń quramyna 60 adam kiredi. Olardyń qatarynda qoǵam jáne mádeniet qairatkerleri, memlekettik organdardyń, saiasi partiialardyń, úkimettik emes uiymdardyń, buqaralyq aqparat quraldarynyń ókilderi bar. Komissiia jumysy alty baǵyt boiynsha jumys isteýde. Bul jumys bizdiń rýhani qundylyqtarymyzdy, bai tarihymyzdy tanytyp, nasihattaýy tiis. Árbir baǵyt boiynsha tiisti jaýapty tulǵalar bekitilgen. Bir ǵana Assambleianyń ózi 200-den astam shara ótkizdi, - dedi Amandyq Batalov. Sondai-aq óńir basshysy oblystaǵy etnomádeni ortalyqtardyń jumysyna erekshe toqtaldy.
Óz kezeginde Parlament Májilisiniń vitse-spikeri Vladimir Bojko:
- Táýelsizdik alǵan jyldardan beri etnomádeni birlestikterdiń barshasy birigip Prezidentimiz únemi aitatyn beibitshilik, kelisim, dostyq degen eń basty bailyǵymyzdy eseleýge óz úlesterin qosyp keledi. Tatýlyqsyz búgingidei biikterdi baǵyndyra almas edik. Barlyq jetistikterimizdiń bastaýynda beibitshilik pen kelisim turǵanyn bilemiz. Qazir elimizdiń barlyq aimaqtarynda kóptegen etnomádeni ortalyqtar óz mereitoilaryn atap ótýde. Bul bizde etnostar mádenietiniń damyp jatqanyn kórsetedi, - dedi óz sózinde.
Rýhani jańǵyrý máselesine qatysty ózge de qatysýshylar pikir qosyp, oi órbitti. Olardyń qatarynda «Orys, slavian jáne kazak uiymdarynyń birlestigi» tóraǵasynyń orynbasary, áskeri-patriottyq «Jas jaýynger» klýbynyń jetekshisi, Vladimir Shatskov, Qazaqstan Respýblikasyndaǵy Resyntymaqtastyq ókili, Almaty qalasynan Irina Pereverzeva jáne basqalary bar. Jiyndy qorytyndylaǵan oblys ákimi kópshilikti osy sharadan keiin ótetin Slavian mádenieti men jazýynyń festivaline shaqyrdy.
Taldyqorǵan qalasyndaǵy Iliias Jansúgirov atyndaǵy Mádeniet saraiynda ótken Slavian mádenieti men jazýy festivaline arnalǵan «Jetisý shuǵylasy» atty merekelik Gala-kontserttiń ashylýynda sóz alǵan oblys ákimi Amandyq Ǵabbasuly merekelik sharaǵa jinalǵan kópshilikti quttyqtap, elimizdegi tatýlyq pen tynyshtyqtyń, turaqtylyq pen beibitshiliktiń uiytqysyna ainalyp otyrǵan ujymdardyń basshylaryna Qurmet gramotasy men Alǵys hatyn tabystady. Sondai-aq, orys tiliniń órkendeýine úles qosyp, orys mádenietiniń keńinen tanylýyna yqpal etip júrgen jandarǵa «Orys, slavian jáne kazak uiymdarynyń qaýymdastyǵy» qoǵamdyq uiymynyń Qurmet gramotasy men Alǵys hatyn uiym tóraǵasy Vladimir Bojko óz qolymen berdi.
Saltanatty jiyn sońy merekelik kontsertke ulasty.
