Túrkistan oblysynda gaz taratý júieleri durys salynbaǵan. Sonyń saldarynan xalyq gazǵa qol jetkize almai otyr. Al «QazTransGaz» durys salynbaǵan júielerdi óz balansyna alǵysy kelmeidi, dep xabarlaidy QazAqparat tilshisi.
QR Energetika vitse-ministri Maǵzum Myrzaǵalievtiń aitýynsha, Túrkistan oblysyna arnaiy komissiia baryp keldi. Sonyń esebine sáikes, 10 gaz taratý stansasy durys salynbaǵan.
«Endi, «QazTransGaz» ol úshin jaýapkershilikti óz moinyna alǵysy kelmeidi. Biraq jaqynda Úkimet basshysynyń Túrkistan qalasyna jasaǵan sapary kezinde biz naqty bir kelisimge keldik. Arnaiy jumys toby qurylady. Qazirgi josparǵa sáikes, aldymen ákimdik, ia bolmasa, merdiger kompaniialardyń kúshimen qazirgi texnikalyq olqylyqtardy túzetý kerek. Sosyn tarif máselesi taǵy bar. Búginde tarif birden bes jylǵa bekitiledi. «QazTransGaz» ókilderi aitady, gaz júielerin ákimdikten qabyldaityn bolsam, onyń bárin ustaý úshin shtatty ulǵaitýǵa týra keledi. Jańa jumysshylarǵa jalaqy tóleý kerek. Al tarifti ózgertýge bolmaidy», - dedi M.Myrzaǵaliev QR Parlament Májilisinde ótken baspasóz máslixatynda.
Onyń sózine qaraǵanda, atalǵan máseleni sheshýdiń eki joly bar. Tarifti kóterý kerek. Sonda «QazTransGaz» qosymsha shyǵyndaryn ótei alady, ia bolmasa, ákimdik ol aqshany jergilikti biýdjetten tólep otyrýy tiis.
«Máselen, «QazTransGaz» ben ákimdik kelisimshartqa otyrady da, jergilikti biýdjetten kompaniianyń servistik qyzmeti tólenip turady. Taldyqorǵan qalasynda solai isteidi. Men bul máseleni óz moinyma alýǵa daiynmyn. Jyldyń sońyna deiin atalǵan máseleni sheshýge tyrysamyz», - dep atap kórsetti M.Myrzaǵaliev.
Aita keteiik, búgingi jiynda QR Energetika vitse-ministri Maǵzum Myrzaǵaliev «Saryarqa» gaz qubyrynyń qurylysy týraly aityp berdi.
«Saryarqa» gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan baǵytymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabiǵi gazben qamtasyz etýge múmkindik bar. Árine, infraqurylymnyń salynýyna qarai gaz tutynatyn adamdardyń sany artady. Ótken jyly tamyz aiynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aiynda «Astana gaz» AQ men merdiger kompaniia -«Qazqurylysqyzmet» AQ arasynda tiisti kelisimshartqa qol qoiyldy. Qazirgi kezde barlyq qajetti texnika men mamandar tartyldy. Dánekerleý jumystary bastaldy. «Saryarqa» gaz qubyrynyń, shamamen, 1300 metri salyndy», - deidi M.Myrzaǵaliev.
Al elordanyń otyn-energetikalyq kesheni jáne kommýnaldyq sharýashylyq basqarmasynyń basshysy Erbol Tóleýov Kóktaldan keiin gazdyń qai baǵytta tartylatynyn túsindirdi.
Qaraǵandy oblysy bolsa, múldem gazsyz qalýy múmkin.
