QR Energetika ministri Maǵzum Myrzaǵaliev Qazaqstanda AES salý bastamasyna qatysty pikir bildirdi, dep habarlaidy QazAqparat.
«2035 jylǵa deiin biz elektr energiiasyn tutyný ári óndirý kóleminiń balansyn jasadyq. Bul - óte kúrdeli jumys. Birneshe ai boiy «KEGOC» kompaniiasy bar, bizdiń iri stansalardyń ókilderi, iri tutynshýlar bar, solarmen birge otyryp balansyn anyqtadyq. Sol kórsetkishterge súiensek, elektr energiiasynyń tapshylyǵy baiqalyp otyr. Osy tapshylyqty bolyrmaý maqsatymen atom stansasyn salý kerek bolady dep aitýǵa tolyq negiz bar», - dedi ol ortalyq kommýnikatsiialar qyzmetinde ótken brifingide.
Vedomstvo basshysy bul ustanymyn myna sebeptermen bailanystyrdy. Onyń paiymdaýynsha, elektr energiiasyn óndirýdiń balama joldary sonshalyq kóp emes.
«Kún nemese jel energiiasyn salýǵa bolady. Alaida ondai stansalar turaqty energiia óndire almaidy. Kún stansasy kúndiz ǵana jumys isteidi. Al jel stansasy jeldi kúni ǵana qýat óndiredi.
Ekinshi nusqa boiynsha gaz elektr stansasyn salýǵa bolady. Biraq bizdiń memleketimizde gazdyń úlken kólemi joq. Biz munaily memleketpiz, alaida gazdy memleket emespiz, ókinishke qarai. Sondyqtan kópjyldyq strategiiamyzda bizde gazdy elektr stansalardy salý múmkindigi joq. Jańa aitqanymdai, 3 GVt gaz stansalaryn salamyz. Odan artyq gaz joq», - dedi ministr.
Onyń aitýynsha, úshinshi jol kómir jaǵatyn stansalar salý.
«Degenmen qazir búkil álemde kómir stansalaryn salýdan bas tartyp jatyr. Álem boiynsha trend sondai. Oǵan halyqaralyq qarajat ta bólinbeidi. Sonymen qatar tiisti qural-jabdyqtarǵa iaǵni, týrbinalar, qazandyqtar shyǵarylmaidy. Ondai 2-3 el ǵana qaldy, basqa elder ondai óndiristi toqtatqan. Sonda ne qalady bizde? Tek atom stansasy ǵana. Sondyqtan, energetik retinde, Energetika mministri retinde aitarym, bul balansta bar jáne salý kerek bolady. Árine bul ońai sheshim emes, óte kúrdeli másele. Degenmen, árine, biz búkil analiz jasaǵannan keiin arnaiy usynamyz», - dedi Energetika ministri.
Maǵzum Myrzaǵalievtiń aitýynsha, zamanaýi tehnologiialar atom elektr stansalaryn burynǵy nusqalaryna qaraǵanda qaýipsiz etýge múmkindik berip otyr.
«Qazir stansa salǵanda óte zamanaýi tehnologiialar qoldanylady. Álem boiynsha qatelespesem 249 atom blogy jumys istep tur. Sonymen qatar, 150-den astam jańa blok salynýda. Eýropa elderinde, arab elderinde, basqa da elderde qolǵan alynǵan. Sondyqtan bul jumys álem boiynsha óte belsendi júrip jatyr. Qazirgi zamanaýi tehnologiialar óte qaýipsiz dep aitýǵa bolady», - dedi ministr.
