Biyl qazaqtyń aqiyq aqyny, bes arystyń biri, Alash qairatkeri, jerlesimiz uly Maǵjan Jumabaevtyń týǵanyna 125 jyl tolady. Osy mereitoiǵa daiyndyq barysy oblystyq SQO ákimdiginiń otyrysynda qaraldy, dep habarlaidy "Ult aqparat" oblys ákimdiginiń baspasóz qyzmetine silteme jasap.
SQO tilderdi damytý basqarmasynyń basshysy Kemel Ospanovtyń aitýynsha, qazirgi tańda aqynnyń mereitoiyn atap ótý kontseptsiiasy jasaldy, onyń aiasynda 250 is-shara ótkizý josparlanǵan. Maǵjan Jumabaevtyń 125 jyldyǵyn merekeleýdiń basty maqsaty: aqynnyń shyǵarmashylyq murasyn nasihattaý, týǵan jerge, óńir tarihyna degen súiispenshilikti arttyrý, jas urpaqty patriotizmge baýlý, uly tulǵanyń atyn máńgi este qaldyrý.
Óńir basshysy Qumar Aqsaqalov TÚRKSOI basshylyǵymen aqyldasa otyra aqiyq aqynnyń mereitoiyn uiymǵa kiretin elderde ótkizý týraly sheshim qabyldanǵanyn málimdedi. Túrki áleminde 2018 jyl «Maǵjan Jumabaev jyly» bolyp jariialanýyna bailanysty aqpan aiynda Halyqaralyq TÚRKSOI uiymynyń uiymdastyrýymen túrki áleminiń mádeni astanasy atalǵan Kastamoný jáne Ankara qalalarynda bastaý alady. Oǵan SQO-nan delegatsiia qatysady. Is-sharalar Batys Qazaqstan, Aqtóbe, Jambyl oblystary jáne Astana qalasynda da atalyp ótiledi.
Oblysta aqynnyń týǵan kúni 25 maýsym qarsańynda «Maǵjan kóktemi» V Respýblikalyq óner festivali, Manash Qozybaev atyndaǵy SQMÝ bazasynda Maǵjan Jumabaevtyń 125 jyldyǵyna arnalǵan Respýblikalyq ǵylymi-praktikalyq konferentsiia, jalpy bilim beretin mektep oqýshylary arasynda Respýblikalyq Maǵjan oqýlary ótkiziledi. Sondai-aq Qazaqstan Respýblikasynyń teńge saraiyna tapsyrys berý arqyly mereitoilyq medal men moneta, sonymen qatar Maǵjan Jumabaevtyń ómiri men shyǵarmashylyǵyna arnalǵan 2 tomdyq kitap shyǵarý josparlanyp otyr.
«Biz eń aldymen Maǵjan Jumabaevtyń shyǵarmashylyǵyna kóp kóńil bólýimiz qajet. Aqynnyń jaryqqa shyqpaǵan óleń jinaqtaryn jariialaý qajet. Halyq kórmegen, estimegen, bilmegen óleń jinaqtary mereitoida baspadan shyǵýy tiis. Mereitoidyń ortalyǵy Maǵjan aýdanda bolady, degenmen, basqa aýdandarda da is-sharalar ótkizý kerek», — dedi Qumar Aqsaqalov.
