Magistratýraǵa túsýge arnalǵan keshendi testileýge qatysý úshin tirkeý 18 maýsym kúni bastalady. Tirkeý Ulttyq testileý ortalyǵynyń app.testcenter.kz saitynda júrgiziledi, dep habarlaidy "Ult aqparat".
«Tirkeý kezinde testileý ótkiziletin oryndy oqýǵa túsýshi ózi tańdaidy. Sondai-aq Ulttyq testileý ortalyǵynyń saitynda baiqaý synaǵynan ótýge bolady. Emtihandar 20 shildeden bastalyp, 10 tamyzǵa deiin jalǵasady», – deidi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Magistratýraǵa túsý formatyna keletin bolsaq, biyl eshqandai ózgeris joq. Testileý nátijesimen kelispegen jaǵdaida testilenýshi KT aiaqtalǵannan keiin 30 minýttyń ishinde apelliatsiiaǵa ótinish bere alady.
«Magistratýraǵa túsýge arnalǵan testileý 3 bólimnen turady: shet tili boiynsha test, oqýǵa daiyndyǵyn anyqtaýǵa arnalǵan jáne bilim berý baǵdarlamalary tobynyń beiini boiynsha test. Shet tilin meńgerýdiń jalpy halyqaralyq quzyretterine (standarttaryna) sáikes shet tilin meńgergenin rastaityn bir halyqaralyq sertifikaty bar magistratýraǵa túsýshiler shet tili boiynsha keshendi testileýden bosatylady», – dep atap ótti A.Toibaev.
Aita ketken jón, biyl memlekettik bilim tapsyrysy boiynsha magistratýraǵa túsý úshin shekti ball ózgerissiz qaldy - 75 ball.
Oqýǵa aqyly negizde túsý úshin 50 ball jinaý qajet.
Emtihan tórt saǵatqa deiin jalǵasady.
Esterińizge sala keteiik, bakalavriat boiynsha granttardyń jalpy sany - 56 561, magistratýra – 13 263, doktorantýraǵa 1890 grant bólingen.
Kadr daiarlaýǵa arnalǵan granttar suranysqa ie baǵyttar boiynsha bólinedi.
