Ulttyq testileý ortalyǵynyń direktory mindetin atqarýshy Didar Smaǵulov osy jyldyń 10-15 tamyzy aralyǵynda magistratýraǵa túsý úshin ótkizilgen keshendi testileýdiń qorytyndysyn jariialady, dep habarlaidy QazAqparat tilshisi.
«Osy jyly magistratýraǵa túsý protsesi aitarlyqtai ózgeristermen tolyqty. Birinshiden, jańa format engizildi. Osy jylǵa deiin tek shet tili boiynsha testileý tapsyryp, ekinshi kezeńde JOO kafedralarynda beiini boiynsha birdei qaǵidattarǵa negizdelmegen estihan tapsyratyn. Bul óz kezeńinde jurtshylyq, quqyqqorǵaý organdary tarapynan jemqorlyq táýekelderdiń bolýyna qatysty synǵa ushyraityn. Biyl emtihan barlyq úmitkerler úshin standartty túrde keshendi testileý formatynda ótti. Osylaisha, barlyq talapkerlerge birdei suraqtardyń berilýine kepildik berip, bireýdi artyq kórý múmkindigin joqqa shyǵardyq. Ekinshiden, ministr Ashat Aimaǵambetovtiń buiryǵymen alǵash ret testileý ótkizý erejelerin qamtamasyz etý úshin Sybailas jemqorlyqqa qarsy is-qimyl agenttiginiń qyzmetkerleri men arnaiy monitoringtik toptardyń ókilderi, sondai-aq BAQ ókilderi, belsendi azamattar baqylaýshy retinde tartyldy», - dedi Didar Smaǵulov búgin Ortalyq kommýnikatsiialar qyzmetinde ótken baspasóz máslihatynda.
Onyń aitýyna qaraǵanda, test tapsyrý protsesi barlyq 27 pýnktte ashyq jáne shynaiy ótkizilgen.
«Bul nátijesin berdi. Keshendi testileýge qatysý úshin 30 579 ótinish qabyldandy. Alaida, testileýge 28 131 adam qatysty. 2500 jýyq úmitker test tapsyrýǵa kelmedi.
Biz muny kúsheitilgen baqylaý jumysymen bailanystyramyz. Demek, kóptegen adam kóshirýdiń múmkin emes ekenin túsingen. Sonymen qatar, 1 myńnan astam úmitker emtihan kezinde kóshirip, tyiym salynǵan zattardy paidalanýǵa tyrysqan. Osylaisha, 1021 nátije joiyldy. Bul talapkerler tipti aqyly negizde oqýǵa túse almaidy», - dedi Didar Smaǵulov.
Ortalyq basshysy atap ótkendei, emtihan kezinde bógde adamdar da anyqtalǵan. 25 adam óziniń ornyna basqa adamdy emtihanǵa kirgizýge tyrysqan.
«Árbir fakti boiynsha aqparat IIM-ge joldandy. Áleýmettik jelilerde alaiaqtyqqa jol bergen osyndai azamattardyń biri Ishki ister ministrliginiń akademiiasynyń mórin qoldan jasaǵan Aqtóbe oblysynyń politsiia qyzmetkeri ekeni jazyldy. Bul fakti boiynsha da biz quqyqqorǵaý organdaryna tiisti shara qoldaný úshin júgindik. Jalpy, 21 myńnan astam asa tyiym salynǵan zattar tárkilendi. Árine, emtihan tapsyrýshylardyń kóbi ol zattardy óz erkimen tapsyrdy», - dedi ol.
Didar Smaǵulov óz sózinde atap ótkendei, L.Gýmilev atyndaǵy Eýraziia ulttyq ýniversitetinde emtihan kezinde bir boijetken tekserýshilerdi aldamaq bolyp, tekserýden tórt ret ótken. Aqyry, ol shpargalka paidalanǵany úshin aýditoriiadan shyǵarylǵan.
«Shyn máninde, barlyǵy sonshalyqty jaman emes. 12853 úmitker memlekettik bilim berý grantyna qatysýǵa múmkindik aldy. Biz bul úmitkerlerdiń tyiym salynǵan zattardy paidalanbaǵanyna, úlken daiyndyqpen óz bilimderine senip kelgenine senimdimiz. Bul – memleket esebinen tegin bilim alýǵa laiyqty parasatty jandar. Olardyń kóbi sol granttardy alady. Óitkeni, barlyq granttar sany sany - 12809», - dedi Didar Smaǵulov.
