Magistratýra men doktorantýrada bilimin jalǵastyrǵan jastardyń 9 paiyzy ǵana oqýdan keiin ǵylymi qyzmetpen ainalysady. «Táýelsizdik urpaqtary» atty respýblikalyq jastar forýmynda sóz sóilegen QR Palamenti Senatynyń Tóraǵasy Máýlen Áshimbaev osyndai statistika keltirdi, dep habarlaidy QazAqparat tilshisi.
«Ekinshiden, tutynýshylyq ideologiiasynan bas tartý qajet. Pandemiiaǵa deiin tutyný mádenieti buryn-sońdy bolmaǵan deńgeige jetti. Tipti tutyný ómirdegi eń basty maqsatqa ainaldy desek te artyq bola qoimas. Jastar arasynda da osyndai úrdis qalyptasqany jasyryn emes. Tolassyz tutyný toqyraýǵa, qundylyqtardyń quldyraýyna ákelip soǵady. Sondyqtan durys qundylyqtardy qalyptastyrýymyz óte mańyzdy. Ol úshin janashyrlyq, jaýapkershilik, sabyr, meiirim siiaqty adamgershilik qasietterdi keńinen dáriptegen jón. Bul rette rýhani kemeldikke, Abai atamyz aitqan Tolyq adam bolýǵa umtylýdyń mańyzy zor», - dedi Senat tóraǵasy.
Spiker jastardy «Birinshi bailyq – densaýlyq» degen ustanymǵa berik bolýǵa shaqyrdy.
«Koronavirýs indeti kezinde densaýlyqtyń qadirin jete túsindik. Sondyqtan salamatty ómir saltyn ustaný asa mańyzdy. Jastardyń gadjetterge úńile bermei, sportpen shuǵyldanýǵa basymdyq berýi de óte ózekti. Sportpen shuǵyldaný, durys tamaqtaný, taza aýada jii bolý, demalys jáne rejimin saqtaý – densaýlyqtyń negizgi faktorlary. Sonymen qatar, bul qaǵidalar qazirgi tańda jetistikke jetýdiń mańyzdy sharty. Jalpy densaýlyqty saqtaý, salamatty ómir saltyn ustaný – adamnyń óz bolashaǵyna salǵan eń basty investitsiiasy», - degen Máýlen Áshimbaev, keleshekte bilim men ǵylymnyń, tehnologiialardyń róli qazirgiden de artatynyn eskertti.
«Pandemiia jaǵdaiy ǵylymnyń qanshalyqty mańyzdy ekenin dáleldedi. Buryn-sońdy bolmaǵan jyldamdyqpen vaktsinalar oilap tabyldy. Bul óz kezeginde indetti salystyrmaly túrde jedel eńserýge múmkindik berdi. Jalpy alǵanda, kúndlelikti ómirimizde ǵylymnyń róli artyp keledi. Keiingi bes jylda elimizde magistratýra men doktorantýrada bilimin jalǵastyrǵysy keletin jastar sany ósip otyr.
Alaida olardyń 9 paiyzy ǵana oqýdan keiin ǵylymi qyzmetpen ainalysady. Memleket ǵylymdy jáne jas ǵalymdardy júieli túrde qarjylandyryp, qoldaý kórsetip keledi», - dep túiindedi ol.
