QR Qarjy naryǵyn retteý jáne damytý agenttiginiń tóraiymy Mádina Ábilqasova Májilis depýtattarynyń saýalyna bergen jaýabynda nesie alǵan azamattardyń quqyǵyn qorǵaý sharalaryn atady, dep habarlaidy QazAqparat.
«Bankten qaryz jáne mikrokredit alǵan azamattardyń quqyqtaryn qorǵaý maqsatynda agenttik mynadai is-sharalardy iske asyrdy. Birinshiden, merzimi ótken kreditter boiynsha bereshektiń ósýin shekteý úshin osy jyldyń 1 qańtardan bastap bankterge jáne mikroqarjy uiymdaryna jeke tulǵalardyń barlyq kepilsiz tutynýshylyq qaryzdary jáne mikrokreditteri boiynsha tóleý merzimi kúntizbelik 90 kún ótken soń turaqsyzdyq aiybyn jáne komissiialar esepteýge zańnamalyq túrde tyiym salyndy», - dedi agenttik tóraiymy.
Onyń aitýynsha, ekinshiden, qaryzdar boiynsha borysh júktemesin shekteý úshin agenttik kirisi eń tómen kúnkóris deńgeiinen tómen azamattarǵa, onyń ishinde ataýly áleýmettik kómek alýshylarǵa qaryzdar, sondai-aq ai saiynǵy tólemderi qaryz alýshynyń ortasha ailyq kirisiniń 50 paiyzynan asatyn qaryzdar berýge tyiym salýdy engizdi. Úshinshiden, prýdentsiialyq talaptar aiasynda bankterdi kredittik táýekelderi joǵary tutynýshylyq kepilsiz kreditterdi berýde shekteý úshin tutynýshylyq kreditter boiynsha bankterdiń menshikti kapitalynyń jetkiliktiligine normativter kapitaldy rezervteý normativterin 150-den 300 paiyzǵa deiin eki ese ulǵaitý túrinde arttyryldy.
«Qaryzdar óteý kezinde qiyndyqqa tap bolǵan qaryz alýshylarǵa qoldaý kórsetý jáne problemalyq bereshekti retteý tetikterin jetildirý maqsatynda agenttik zańnamalyq aktilerge túzetýlerdiń qosymsha blogyn ázirledi. Bankterdiń qaryzdy qaita qurylymdaýǵa qaryz alýshylardyń ótinishterin qaraýdyń mindetti rásimin engizý, boryshkerlerdi qaita qurylymdaý jáne ońaltý talaptarynyń tizbesin keńeitý, kepildi ótkizgen jaǵdaida ipotekalyq turǵyn úi qaryzy boiynsha ótelmegen bereshekti keshirý kózdeledi. Budan basqa, kapitaldandyrylǵan merzimi ótken syiaqy somasyna syiaqylar esepteýge, onyń ishinde jańa qaryz bergen kezde esepteýge tyiym salýdy engizý qarastyrylady», - dedi Mádina Ábilqasymova.
Agenttik tóraiymynyń atap ótýinshe, túzetýler blogy Qazaqstan Respýblikasy Prezidentiniń Ákimshiliginde qaralýda.
«Ony Qazaqstan Respýblikasy Parlamenti Májilisiniń depýtattary bastama jasaǵan «Qazaqstan Respýblikasynyń keibir zańnamalyq aktilerine Qazaqstan Respýblikasynda mikroqarjylyq jáne kollektorlyq qyzmetti retteý máseleleri boiynsha ózgerister men tolyqtyrýlar engizý týraly» QR Zańynyń jobasyna engizý josparlanyp otyr», - dedi ol.
