QR Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev Aleksei Poltoraninge qatysty daý boiynsha túsinikteme berdi, dep habarlaidy QazAqparat tilshisi.
«Aleksei Poltoranin ózge sportshylarmen birge Aýstriiada ustaldy. Kútpegen jerden jarystan bir jarym saǵat buryn tekserip, qamaýǵa alǵan. Biz ondaǵy Konsýldyqpen bailanysqa shyqtyq. Ázirge HOK, VADA, Halyqaralyq shańǵy jarystary federatsiiasy eshqandai aqparat bermedi. Aýstriianyń zańyna sáikes, azamatty sebepsizden-sebepsiz 48 saǵat qamaýda ustai alady. Jaýap kútip otyrmyz. Men Alekseidiń taza sportshy ekenine senimdimin. Bar bolǵany, sátsiz ýaqytta, yńǵaisyz jerde bolǵany», - dedi Serik Sápiev QR Mádeniet jáne sport ministrliginde ótken brifingte.
«Olimpiada oiyndaryna bir kún qalǵanda tún ishinde doping-ofitserler kelip, sportshylardy teksere alady. Sportshy jáne jetekshi retinde dál osy tekserýlerdi quptamaimyn. Bul sportshynyń jeke keńistigine qol suǵý sekildi. Fizikalyq jáne psihologiialyq turǵyda da ońaiǵa soqpaidy», - dedi ol.
Komitet basshysy doping qoldandy degen kúdikpen ustalǵan qazaqstandyq sportshynyń qazir tergeý oqshaýlaǵyshynda otyrǵanyn jetkizdi.
«Memlekettik organ basshysy retinde mundai jaǵdailardy azaitý úshin ózimizdiń Ulttyq olimpiadalyq komitet atynan talap aryz jazý kerek shyǵar. Jarys aldynda sportshyny mazalamai, jái ǵana synama alyp ketkenderi durys. Múmkin, aiaqtan shalǵysy kelgender de bar shyǵar. Sebebi, ol (Aleksei Poltoranin - red.) óz qashyqtyǵynda altyn júldege úmitker bolǵan. Ony jarystan shyǵaryp tastaǵysy kelgen shyǵar», - dedi Serik Sápiev Astanada ótken brifingte.
Eske sala ketsek, keshe Aýstriianyń Zeefelde qalasynda ótip jatqan álem chempionatynda Aleksei Poltoranin jarys jolyna shyqpai qaldy.
Nemis jýrnalisi Haio Zeppelt Týitterdegi akkaýntynda «shańǵy jarysynan ótip jatqan álem chempionatynda Qazaqstan, Aýstriia men Estoniia sportshylary antidopingtik erejelerdi buzdy» degen kúdikke ilingenin jazdy
