Mádeniet jáne sport ministrligi bokstan Olimpiada chempiony Baqyt Sársekbaevtyń Qazaqstan quramasynyń Tashkentte ótetin Aziia chempionatyna qatyspaýyna qatysty aitqan pikirine jaýap berdi, dep habarlaidy QazAqparat.
Buǵan deiin Baqyt Sársekbaev Instagram paraqshasynda jazba qaldyrǵan bolatyn.
«Sizder Parij-2024 Olimpiadasynda Tokio-2020-daǵydai nátijeni qalap otyrsyzdar ma? Sizder elimiz ben sportshylarymyzdy Aziia chempionatyna jáne odan keiin Aziia oiyndaryna qatysýǵa laiyqsyz dep kemsitpeksizder me? Sportta mańyzy tómen match bolmaidy!», - dep jazdy boksshy.
Osyǵan orai QR Mádeniet jáne sport ministrligi boksshynyń pikirine jaýap berip, ulttyq quramanyń atalǵan jarystarǵa qatysýdan bas tartý sebebin túsindirdi.
«Bastapqyda Qazaqstan quramasy atalǵan jarysqa qatysýdy josparlaǵan edi. Alaida, PTR-test tapsyrý barysynda Qazaqstannyń qyzdar ulttyq quramasy músheleriniń arasynda koronavirýspen aýyrǵandar sanynyń kóp bolýy josparymyzǵa túzetý engizdi. Alty sportshymyzdan PTR-testileýdiń oń nátijesi shyǵýyna bailanysty sanitarlyq-epidemiologiialyq qyzmet jattyǵý bazasyn karantinge jabý týraly sheshim qabyldady», - dep túsindiredi QR MSM Sport jáne dene shynyqtyrý isteri komiteti tóraǵasynyń orynbasary Aigúl Bektenova.
Onyń atap ótýinshe, infektsiianyń paida bolýyna jáne taralýyna jol bermeý maqsatynda bokstan ulttyq quramanyń bas bapkeri aldaǵy Aziia chempionatyna qatyspaý týraly sheshim qabyldaǵan.
«Oryn alǵan jaǵdaida atalǵan is-shara qazaqstandyq sportshylar men olardyń bapkerleriniń densaýlyǵyn saqtaý maqsatynda qajet boldy. Buǵan qosa, tótenshe jaǵdai rejiminiń engizilýine bailanysty bokstan erler quramasy Aziia chempionatynda daiyndyqqa arnalǵan oqý-jattyǵý jiynyn ótkize almady. Sondyqtan bapkerler shtaby atalǵan birinshilikke qatyspaý týraly sheshim qabyldady», - dedi ol.
Ministrlik ókiliniń sózine qaraǵanda, taiaý ýaqytta Qazaqstannyń qurama komandasy 2022 jyldyń maýsymyna josparlanyp otyrǵan Aziia boks konfederatsiiasy uiymdastyratyn Erler men qyzdar arasynda bokstan Aziia chempionatyna qatysý úshin belsendi daiyndyqty bastaidy.
