QR Prezidenti Qasym-Jomart Toqaev elimizdiń Mádeniet jáne sport ministri laýazymyna Aqtoty Raiymqulovany taǵaiyndady, dep habarlaidy "Ult aqparat" Aqordaǵa silteme jasap.
«Aqtoty Rahmatollaqyzy Raiymqulova Qazaqstan Respýblikasynyń Mádeniet jáne sport ministri bolyp taǵaiyndalsyn», - delingen Memleket basshysynyń Jarlyǵynda.
Aqtoty Raiymqulova 1964 jyly 2 mamyrda Almaty qalasynda dúniege kelgen. Turmysqa shyqqan, Ospan jáne Álim esimdi eki uly bar.
Qazaq, orys, aǵylshyn tilderin meńgergen. 25 ǵylymi eńbektiń avtory.
Aqtoty Raiymqulovanyń shyǵarmalary resmi is-sharalarda oryndalady.
Ol "El baqyty", "Apple of Peace", "Kókjal qantatysy", "Tolǵaý", "Dala syry", "Jámilia" simfoniialyq poemalarynyń, "Aspan kóshi" eki aktili baleti, "Alataý" pesasy, "Sońǵy sezim", "Tuzdy shól", "Abai", "Eńlik-Kebek", "Abylaihan", "Adam balasy Qaiyn", "Estaidyń Qorlany", "Gamlet", "Qorqyttyń kóri", 'Syǵan serenadasy" syndy spektakl, filmder men serialdardaǵy saýndtrekterdiń avtory.
1987 jyly Qurmanǵazy atyndaǵy Almaty memlekettik konservatoriiasyn "kompozitsiia" jáne "fortepiano" mamandyǵy boiynsha támamdady. Keiin osy joǵary oqý ornynda "kompozitsiia" baǵyty boiynsha aspirantýrada oqydy;
2007-2010 jyldary doktorlyq dissertatsiiasyn sátti qorǵap, doktor atandy;
Resei Federatsiiasy janyndaǵy halyq sharýashylyǵy biznes akademiiasynyń MVA dárejesin aldy. Ǵylymi ataǵy – DBA (Doctor of Business Administration).
Jańa ministr óziniń eńbek jolyn Qurmanǵazy atyndaǵy Almaty memlekettik konservatoriiasynda pedagog bolyp bastady. Keiin qazaq memlekettik qyzdar pedagogikalyq institýtynda oqytýshy qyzmetin atqarǵan.
Aqtoty Raiymqulova Qurmanǵazy atyndaǵy Almaty memlekettik konservatoriiasy "dirijerlik" kafedra meńgerýshisi, rektordyń kómekshisi, dotsent, professordyń mindetin atqarýshy, áleýmettik-ekonomikalyq ister jónindegi prorektory laýazymyna deiin jetti.
2003-2007 jyly Qurmanǵazy atyndaǵy Almaty memlekettik konservatoriiasynyń "Kompozitsiia jáne orkestrlik dirijer" kafedrasynyń meńgerýshisi bolǵan.
