QR Mádeniet jáne sport ministri Dáýren Abaev Almaty qalasyna jumys sapary aiasynda Sh.Aimanov atyndaǵy «Qazaqfilm» kinostýdiiasynda boldy, dep habarlaidy QazAqparat.
Kinostýdiia baspasóz qyzmetiniń málimetinshe, ministrmen kezdesýge QR Mádeniet jáne sport vitse-ministri Nurǵisa Dáýeshov, KSRO halyq ártisi, kinostýdiianyń kórkemdik jetekshisi Asanáli Áshimov, sondai-aq kinostýdiianyń ákimshilik-sharýashylyq isi jónindegi vitse-prezidenti Aidarhan Ádilbaev, óndiris jónindegi vitse-prezidenti Aidar Batalov, «Qazaqfilm» prezidentiniń strategiialyq máseleleri boiynsha keńesshisi Áli Sháýkenov jáne basqalary qatysty.
Kezdesý barysynda Mádeniet jáne sport ministri Dáýren Abaev kinostýdiiadaǵy Qazaq kinosynyń mýzeiin aralap, eski kino kameralar men basqa da quraldar, qoldanylǵan kostiýmder, Sháken Aimanovtyń jinaǵan kollektsiiasy men ózi qoldanǵan jeke zattar saqtalǵan ulttyq kino óneriniń tarihynan syr shertetin jádigerlermen tanysty.
Sondai-aq ministrge 2021-2023 jyldarǵa josparlanǵan modernizatsiia baǵdarlamasy aiasynda satyp alynǵan zamanaýi túsirilim tehnikasy – kameralar, jaryq quraldary jáne basqa da jabdyqtar kórsetildi. Kezdesý barysynda «Qazaqfilmniń» basshylary ministrge sońǵy eki jylda túsirilgen filmder týraly jan-jaqty baiandap berip, elimizdiń basty kino alańynyń búgingi tynys-tirshiligi men alǵa qoiǵan josparlarymen bólisti. Óz sózinde kinostýdiianyń vitse-prezidenti Aidrahan Ádilbaev «Qazaqfilmniń» modernizatsiiasy boiynsha egjei-tegjei baiandap, qosymsha qarjylandyrý múmkindigin qarastyrý týraly ótinishin bildirdi.
«Qazaqfilm» - elimizdiń brendi. Kinostýdiia eldiń kóńilinen shyǵatyn súbeli týyndylardy túsirýi jáne osy baǵytta jumys isteýimiz kerek», - dedi Dáýren Abaev.
Basqosý sońynda kinostýdiianyń kórkemdik jetekshisi Asanáli Áshimov QR Mádeniet jáne sport ministri Dáýren Abaevqa «Qazaqfilmge» kelip, ulttyq kino óneriniń problemalaryna asa kóńil bólgenine alǵysyn aitty. Sondai-aq qazaq kinosynyń abyzy quramyna Oljas Súleimenov, Dýlat Isabekov, Smaǵul Elýbaev syndy basqa da kórnekti qairatkerler kiretin abyroily kórkemdik keńes qurýdy usyndy.
Kezdesýden keiin jinalǵandar «Uly dala tańy» tarihi filminiń jumys nusqasyn tamashalady. Aita ketsek, filmniń rejisseri Aqan Sataev oqshaýlaý rejiminde bolǵandyqtan, kezdesýge qatysa almady. Alaida, filmniń kórsetilimine basty róldi somdaǵan akterler – Qazaqstannyń halyq artisi Tuńǵyshbai Jamanqulov, Qazaqstannyń eńbek sińirgen qairatkeri Berik Aitjanov, filmniń keńesshisi– belgili tarihshy, professor Bereket Káribaev, kinostýdiianyń Direktorlar keńesiniń múshesi Armanjan Baitasov jáne basqa da óner qairatkerleri qatysty.
Tarihi kinotýyndyny tamashalaǵan qonaqtar joǵary baǵa berip, filmniń tartymdy jelisi men basty keiipkerlerdiń rólin somdaǵan akterlerdiń sheberligin atap ótti.
