QR Mádeniet jáne sport ministrligi Zań qyzmeti departamentiniń direktory Kúmis Seiitova vedomstvonyń laýazymdy tulǵalarynyń ústinen qylmystyq is qozǵalýyna qatysty túsinikteme berdi, dep habarlaidy QazAqparat tilshisi.
«Búgingi kúni QR Mádeniet jáne sport ministrliginiń jaýapty hatshysy Qýatjan Ýáli 24 qarashadan bastap ministrdiń resmi buiryǵyna sáikes 10 kúnge aqysyz demalysqa ketken. Sondyqtan quzyretti organdardyń tarapynan naqty sheshim qabyldanǵanǵa deiin negizsiz qorytyndy shyǵarý durys emes dep esepteimiz. Ministrlik óz tarapynan jaǵdaidy tolyqqandy baǵalaý úshin Jemqorlyqqa qarsy is qimyl ulttyq biýrosyna jan-jaqty járdem berip, suraý salynǵan qujattarmen kedergisiz qamtamasyz etip otyr», - dedi ol.
Sonymen qatar, ol Ákimshilik departamentiniń direktory Erenai Dárjibaevtyń ústinen Memlekettik qyzmet isteri jáne sybailas jemqorlyqqa qarsy is-qimyl agentti is qozǵaǵandyǵyn atap ótti.
«Departament basshysy 24 qazannan beri jumys ornynda joq. Telefony óship tur. Sondyqtan qazirgi ýaqytta departament direktorynyń mindetin atqarý ýaqytsha basqa qyzmetkerge júktelgen», - degen Kúmis Seiitova ministrliktiń jaýapty hatshysy laýazymy ýaqytsha ózine júktelgenin aitty.
Aita ketsek, buǵan deiin Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Janna Bastarova Mádeniet jáne sport ministrliginiń laýazymdy qyzmetkerleriniń paramen ustalý jaǵdaiyna qatysty pikir bildirgen bolatyn.
Odan keiin Mádeniet jáne sport ministrligi Ákimshilik departamentiniń direktory Erenai Dárjibaev úiqamaqqa alynǵany habarlanǵan bolatyn.
