QR Mádeniet jáne sport ministri Arystanbek Muhamediuly elorda turǵyndaryn Erjan Maksimniń jeke kontsertine shaqyrdy, dep habarlaidy QazAqparat tilshisi.
«2019 jylǵy 28 maýsymda saǵat 19:00-de «Qazaqstan» ortalyq kontsert zalynda QR Mádeniet jáne sport ministrliginiń uiymdastyrýymen jas daryn Erjan Maksimniń jeke kontserti ótedi», - dedi ministr elordada ótken baspasóz máslihatynda.
Atap aitqanda, jas daryn iesimen birge Qazaqstannyń eńbek sińirgen qairatkerleri Sáken Maiǵaziev, Móldir Áýelbekova, Renat Gaisin, sondai-aq halyqaralyq jáne respýblikalyq konkýrstardyń laýreaty Aiqyn Tólepbergen óner kórsetedi.
«Osy oraida úlken kontsert ótetinin aitqym keledi. Keibir óner juldyzdary da shaqyrylady, iaǵni otandyq jáne sheteldik estrada juldyzdary kelmek», - dedi A. Muhamediuly. Onyń sózine qaraǵanda, bul kontsert jas daryn úshin mańyzdy qadam bolyp otyr. E. Maksim jandy daýyspen óner kórsetedi jáne kontsert estradalyq simfoniialyq orkestrdiń súiemeldeýimen ótedi.
Sondai-aq, ol aldaǵy kúnderi Reseidegi «Golos. Deti» án baiqaýynyń arnaiy shyǵarylymyna qatyspaq. Bul týraly elordada ótken baspasóz máslihatynda jas darynnyń anasy Gúlmira Álibek málim etti.
«Erjan bul sharaǵa qatysady. Osydan basqa eshteńe aita almaimyn», - dedi G. Álibek Mádeniet jáne sport ministrliginde ótken baspasóz máslihatynda.
Aita ketken jón, Erjan Maksim Reseidegi «Golos. Deti» jobasynda ekinshi oryn ielengen bolatyn.
«Qazirgi bul konkýrs nemese gala-kontsert retinde ótetindigi anyqtalyp jatyr. Búginde Uiymdastyrýshylar ózderi osyny pysyqtaýda. Biraq Erjan naqty qatysady. Nege qatyspasqa? Ol úlken telearnada óz ónerin taǵy bir márte pash etedi», - dedi QR Mádeniet jáne sport ministri Arystanbek Muhamediuly.
Budan buryn habarlanǵandai, jaqynda Erjan qatysqan «Golos.Deti» baiqaýynyń nátijesi joqqa shyǵaryldy.
Baiqaýdyń daýys berý nátijelerine tekserý júrgizgen Group-IB kompaniiasy qatysýshylardyń birine avtomatty túrde SMS-daýystar joldanǵanyn buǵan deiin tirkegen bolatyn.
«Aralyq tekserýler daýys berý protsesine syrttan yqpaldyń bolǵanyn rastady. Sońǵy esep mamyr aiynyń sońynda belgili bolady. Alaida, Birinshi arna biylǵy maýsym nátijelerin qazirden joqqa shyǵarý jóninde sheshim qabyldady» - delingen aqparatta. Atalmysh arna baiqaýǵa daýys berý sharalarynyń qaýipsizdigin kelesi maýsymǵa deiin jetildiretinin málimdep otyr.
Al Altynshy maýsym nátijeleri joqqa shyǵarylǵandyqtan, 24 mamyrda aqtyq synǵa qatysýshylardyń arnaiy shyǵarylymy bolady. Eske salsaq, 11 jastaǵy oraldyq ónerpaz Erjan Maksim atalmysh konkýrsta Valerii Meladzeniń komandasynda óner kórsetip, ekinshi oryn ielengen edi.
