Sýret: Aqorda
Mádeniet jáne aqparat ministri Aida Balaeva óner adamdarynyń qamaýǵa alynýyna qatysty pikir bildirdi.
Facebook paraqshasynda jazba jariialaǵan ministr óner adamdarynyń elge úlgi, qoǵamǵa baǵdar bolýy keregin aitty.
"Qoǵamdy qaryshtap ósiretin de, tuqyrtyp óshiretin de - mádeniet. Mádeniet tek óner men bilim, ozat talǵam pen tazalyq emes. Bul, eń aldymen, adamnyń ishki rýhaniiaty, halyqtyń órkeniettik bolmysy. Endeshe, sol mádeniettiń týyn kóterip, ónerdiń tasyn órge domalatyp júrgen árbir maitalman - elge úlgi, qoǵamǵa baǵdar bolýy shart. Ókinishke qarai, sońǵy kezde mádeniet salasyndaǵy belgili azamattarǵa qatysty jaǵymsyz oqiǵalar, keide tipti zańsyz áreketter jiilep ketti. Árine, jeke-dara adam retinde, qarapaiym azamat retinde kimge bolsa da pendeshilik tán qasiet. Adam bolǵan soń qatelesýiń múmkin, biraq onyń arty zańdy attaýǵa barmaýǵa tiis", – dedi ol.
Aida Balaeva mádeniet qairatkerleri zań men urpaq aldyndaǵy osynaý úlken jaýapkershiligin túsinýi kerek deidi. Onyń sózinshe, laýazymyna, tanymaldylyǵyna, qoǵamdaǵy ornyna qaramastan, zań bárine ortaq.
"Ózin naǵyz "mádeniet qairatkerimin" deitin jan úshin tanymaldyq zańsyzdyqqa jol beretin qudyret emes. Olar qashanda ult mádenieti damýynyń qozǵaýshy kúshi sanalady. Sondyqtan olardyń kópke yqpaly tek ónege, nasihat, jaqsylyqqa arqaý bolýy tiis. Mádeniet qairatkerleri Zań men Urpaq aldyndaǵy osynaý úlken jaýapkershiligin túsinýi kerek. Bul memleket basshysynyń barsha qazaqstandyqtardan talap etip otyrǵan biregei úndeýi. Laýazymyna, tanymaldylyǵyna, qoǵamdaǵy ornyna qaramastan, zań bárine ortaq. Al memleket osy qaǵidanyń múltiksiz oryndalýyn qamtamasyz etedi. Sóz joq, Uly Abaidan beri kele jatqan qoǵamdaǵy nadandyqpen kúrestiń aldyńǵy shebinde mádeniet maitalmandary júrýi tiis. Osy oraida men barshamyzdy osyny umytpaýǵa shaqyramyn! Biz quqyqtyq tártip pen ózara qurmetke negizdelgen ári mádeni qundylyqtarymyzdy qaster tutatyn qoǵamdy birge qura alamyz. Jáne bul bizdiń bolashaǵymyzdyń berik negizi bola alady dep senemin", – dep túiindedi ministr.
