Belarýs basshysy Aleksandr Lýkashenko (sailaý nátijesin burmalady dep aiyptaǵan AQSh pen Eýropa odaǵy ony prezident qyzmetinde zańsyz otyr dep biledi), eger Ýkraina áskeri Donbastaǵy separatisterge shabýyl jasaityn bolsa, onda Belarýs áskeri "dál Resei áskeri siiaqty áreket etedi" dep málimdedi.
Reseilik telejúrgizýshi Vladimir Soloviovtiń "iaǵni bul (áreket) birlesip jasala ma?" degen suraǵyna Lýkashenko "árine" dep jaýap berdi. Ol Belarýs Ýkrainaǵa qarsy Reseimen birge soǵysady dep naqty aitqan joq, degenmen, sózinen sondai emeýrin ańǵarýǵa bolady.
Resei áskeriniń Belarýste Ýkrainamen shekara mańyna ornalasýy beker emesin meńzegen Lýkashenko "Biz ne, ońtústik shekarada erikkennen júr deisizder me?"dedi.
Resmi Minsk pen Máskeý, áskeriler aqpannyń ony men jiyrmasy aralyǵynda ótetin birlesken áskeri jattyǵýǵa qatysý úshin jinalyp jatqanyn habarlaǵan.
Kiev 2020 jyly Minskidegi azamattardyń beibit narazylyq aktsiiasyn kúshpen basqan Lýkashenko rejimin synaǵannan keiin Belarýs pen Ýkraina qarym-qatynas nasharlaǵan.
AQSh byltyr kúzden beri Ýkrainamen shekarada áskerin kóbeitken Resei kórshi elge basyp kirýi múmkin dep qaýiptenedi. Máskeý bolsa shabýyl jospary joǵyn aitady. Batys elderi Resei Ýkrainaǵa basyp kirse, sanktsiia salatynyn qatań eskertken.
Vladimir Soloviovke bergen suhbatynda Lýkashenko, 15 jyldan keiin Ýkraina da, Qazaqstan da Resei men Belarýs sekildi bir odaqtyń quramyna kire alatyny jaily da aitqan.
