Qazaqstanda eresekter men balalardyń baýyryn almastyrý operatsiiasy tuńǵysh ret belarýstyq mamandardyń qatysýymen jasaldy. Bul týraly Elbasy Nursultan Nazarbaevpen keńeitilgen quramdaǵy kelissózder barysynda Belarýs Prezidenti Aleksandr Lýkashenko aitty, dep habarlaidy QazAqparat tilshisi Minskiden.
«Bizdiń elderimiz shyn máninde gýmanitarlyq saladaǵy ózara is-qimyldyń nátijelerine maqtana alady. Postkeńestik keńistikte Belarýs pen Qazaqstannyń 40-tan astam joǵary oqý oryndary men ǵylymi-zertteý institýttary arasynda ǵylymi-bilim konsortsiýmy quryldy. Belarýsta 500-den astam Qazaqstan azamaty bilim alýda. Meditsinalyq saladaǵy yntymaqtastyq ta joǵary qarqynmen damýda. Aitpaqshy, Qazaqstanda eresekter men balalardyń baýyryn almastyrý birinshi operatsiiasy belarýstyq mamandardyń qatysýymen jasaldy», - dedi Lýkashenko.
Belarýs Prezidenti bilim berý, mádeniet, densaýlyq saqtaý salalarynda bailanystardy odan ary da joǵary deńgeide ilgeriletýge nietti ekendigin jetkizdi. Sonymen qatar eki el arasynda Mádeniet kúnderin qaitadan ótkizýdi bastaý usynysyn aitty.
«Taǵy da aitamyn, Qazaqstan biz úshin strategiialyq seriktes jáne biz barlyq baǵyttardaǵy ónimdi ózara is-qimylǵa baǵyttalǵan osynaý tyǵyz bailanystarymyzdy óte joǵary baǵalaimyz. Qurmetti Nursultan Ábishuly, men sizge egerde biz qandai da bir máselelerde kelisimge kelsek, onda atalǵan ýaǵdalastyqtyqtan taimaýǵa kepildik beremin jáne Sizderde jańa tarihymyzdyń barlyq kezeńderindegidei esh ýaqytta bizben túiindi problema bolmaidy», - dedi Lýkashenko.
