2020 jyldyń 11 naýryzy men 24 sáýiri aralyǵynda Lufthansa nemis áýe kompaniiasy Qazaqstanǵa reisterdi ýaqytsha toqtatty, dep habarlaidy Azamattyq aviatsiia komiteti.
«Búgingi kúnge deiin áýe kompaniiasy Frankfýrt-Almaty-Frankfýrt (aptasyna 4 ret) jáne Frankfýrt-Almaty-Nur-Sultan (aptasyna 3 ret) baǵyttary boiynsha turaqty reisterdi oryndady. Aldyn ala aqparat boiynsha, áýe tasymaldaýshy osy baǵyttar boiynsha ushýlardy 2020 jyldyń 25 sáýirinen bastap jańartýdy kózdep otyr», delingen habarlamada.
Áýe kompaniianyń aqparaty boiynsha, atalǵan kezeńde aviabiletteri bar jolaýshylar biletterdi tolyq kólemde qaitara alady.
«2020 jylǵy 3 naýryzdan bastap «Qazaqstannyń aviatsiialyq ákimshiligi» AQ bazasynda koronavirýsqa qatysty jaǵdaidy baqylaýǵa baǵyttalǵan ahýaldyq ortalyq josparly túrde jumys istei bastady. Ortalyqta Qazaqstanǵa turaqty jáne turaqty emes áýe qatynastary bar elderde infektsiia juqtyrǵan adamdardyń statistikasyna baqylaý júrgiziledi», delingen habarlamada.
Jolaýshylar áýe biletterin qaitarý boiynsha «Qazaqstannyń aviatsiialyq ákimshiligi» kompaniiasynyń 8 (7172) 64 58 41 nómiri boiynsha qaýyrt jelisine habarlasýy kerek. Bailanys telefony jumys kúnderi (5/2) saǵat 9.00-dan 18.00-ge deiin isteidi.
