Foto: Tengrinews.kz/Turar Qazanǵapov
LRT jobasyn 2 jyldyń ishinde aiaqtaý josparlanyp otyr. Bul týraly elimizdiń áleýmettik-ekonomikalyq damýy jónindegi keńeste Elorda ákimi Jeńis Qasymbek aitty, dep habarlaidy QazAqparat.
«Biyl qala ishinde jáne elordanyń ainalasyndaǵy jasyl beldeýde millionǵa jýyq jasyl jelek otyrǵyzýdy josparlap otyrmyz. Jyl basynan beri 733 myń sharshy metr turǵyn úi salyndy. Bul ótken jyldyń tiisti kezeńimen salystyrǵanda 22 paiyzǵa artyq. Jyl sońyna deiin barlyǵy úsh millionnan astam sharshy metr turǵyn úidi paidalanýǵa berýdi josparlap otyrmyz. Bul - 40 myńnan astam páter, onyń ishinde halyqtyń áleýmettik osal toptary úshin memleket bólgen - 6 myń páter bar. Sonymen qatar, biyl «Nurly jer» baǵdarlamasynyń ekinshi kezeńi aiasynda salynyp jatqan barlyq problemalyq úlestik nysandardy aiaqtap, paidalanýǵa berýdi josparlap otyrmyz», - dedi qala basshysy.
Onyń atap ótýinshe, biyl naýryzda qalalyq jańǵyrtý baǵdarlamasy 2030 jylǵa deiin ózektendirildi, nátijesinde 206 apatty úidi kóshirý josparlanýda.
«LRT-niń birinshi iske qosý kesheniniń qurylys jumystary qaita jandandy. Jobany 2 jyldyń ishinde aiaqtaýdy josparlap otyrmyz. Sonymen qatar biyl uzyndyǵy 55 shaqyrym 72 kóshege qurylys-jóndeý jumystaryn júrgizemiz jáne Táýelsizdik kópiri qurylysyn aiaqtaimyz», - dedi Jeńis Qasymbek.
