Nur-Sultan qalasynyń ákimi Altai Kólginov elordadaǵy jeńil relsti (LRT) kóliktiń qurylysyna qatysty ózekti suraqtarǵa jaýap berdi, dep habarlaidy "Ult aqparat".
«LRT boiynsha: barlyq normativti-quqyqtyq qujattar úkimettik jáne jergilikti atqarýshy organdar deńgeiinde qabyldandy. Qazirgi ýaqytta ekinshi deńgeili bankter tiisti jumystardy júrgizip jatyr», - dedi qala basshysy Úkimet otyrysynan keiin tilshilerdiń suraǵyna jaýap bere otyryp.
Ol óz sózinde qytailyq investitsiiadan bas tartý týraly sheshim qabyldanǵanyn eske saldy.
«Budan buryn aitqanymyzdai, biz qytailyq qaryzdan bas tartyp, 800 mln AQSh dollaryn únemdep qaldyq. Biz «Halyq bankpen» 3 paiyzdyq qaryzben 500 mln (AQSh dollary), sondai-aq, 100 mln (AQSh dollary) boiynsha «Báiterek» holdingimen kelistik. Bul qarajat jumysty bastap ketýge jetkilikti», - dedi ol.
Buǵan deiin Qazaqstan prezidenti Qasym-Jomart Toqaev Astana LRT jobasyn synǵa alǵan bolatyn. Prezidenttiń aitýynsha, joba tiimsiz bolsa, oǵan únemi sýbsidiia bólip, biýdjet qarjysyn jumsaýǵa týra keledi.
Bastapqyda LRT jobasynyń quny 1,8 milliar dollar bolǵan edi. Qytaidyń damý bankinen qaryz alǵan jaǵdaida, úkimet 2,6 milliard dollar qaitarýy tiis bolatyn. Alaida memleket sheteldik qaryzdan bas tartty.
