QR Parlamenti Májilisi «QR-nyń keibir zańnamalyq aktilerine lotereialar jáne lotereia qyzmetiniń máseleleri boiynsha ózgerister men tolyqtyrýlar engizý týraly» zań jobasyn maquldady, dep habarlaidy QazAqparat.
Atalǵan qujat boiynsha baiandama jasaǵan Ekonomikalyq reforma jáne óńirlik damý komitetiniń múshesi Áliia Saparovanyń aitýynsha, zań jobasy 2020 jyldyń 5 aqpanda Májilistiń jalpy otyrysynda birinshi oqylymda maquldanǵan. Zań jobasymen 1 kodekske, 2 zańǵa ózgerister men tolyqtyrý engiziledi.
«Zań jobasyn birinshi oqylymda Parlament Májilisiniń jalpy otyrysynda talqylaý barysynda, Májilis tóraǵasynyń tapsyrmasy boiynsha ekinshi oqylymǵa daiyndaý barysynda depýtattar «QR-nyń Ákimshilik quqyq buzýshylyq týraly» kodeksine lotereia operatory bolyp tabylmaityn tulǵanyń lotereia ótkizgeni úshin birinshi ákimshilik quqyq buzýshylyq kezinde aiyppul túrindegi jaýaptylyqty engizý boiynsha jáne «Jarnama týraly» Zańǵa lotereia operatory jáne lotereia operatorymen shart aiasynda lotereia taratýshylar ornalastyratyn jarnamany qospaǵanda lotereia jarnamasyna tyiym salý jóninde túzetý engizildi. Budan basqa lotereia ótkizýdiń ashyqtyǵyn jáne barynsha aishyqtyǵyn qamtamasyz etý maqsatynda «Lotereialar jáne lotereia qyzmeti týraly» Zańǵa tirajdyq kommisiianyń jáne lotereia taratýshynyń agentiniń mindetterin kózdeitin túzetýler engizildi», - dedi Májilis depýtaty.
Sondai-aq, onyń aitýynsha, depýtattar zań jobasynyń jekelegen normalaryn naqtylaityn jáne onyń mazmunyn jaqsartatyn túzetý qosyp otyr. Jumys tobyna 60 túzetý kelip túsken.
Májilis depýtattar zań jobasyn maquldap, Senat qaraýyna jiberdi.
