Soltústik Qazaqstan oblysynda SOVID-19 juqtyrǵan sońǵy eki naýqaspen 93 adam bailanysta bolǵan, dep habarlaidy QazAqparat.
SQO ákiminiń orynbasary Rýslan Álishev onlain-brifing barysynda koronavirýs indetin juqtyrýdyń sońǵy eki jaǵdaiy týraly málimet berdi.
«Koronavirýs infektsiiasy London-Petropavl reisimen kelgen eki adamnan tabyldy. Biri – Kanada ýniversitetinde oqyǵan 20 jastaǵy boijetken stýdent, ekinshisi – 40 jastaǵy áiel. Ekeýi de Qazaqstannyń basqa qalalarynyń turǵyndary. Qazir olar Petropavldaǵy qalalyq aýrýhananyń juqpaly aýrýlar bólimshesinde jatyr. Jaǵdailary jaqsy, tiisti em alýda», - dedi Rýslan Álishev.
Atalmysh eki naýqaspen 93 adam bailanysta bolǵan, onyń ishinde 20-sy – jaqyn qarym-qatynasta bolǵandar. Olar qosymsha tekserilip, Petropavldaǵy statsionarǵa 14 kúnge karantinge jatqyzylady. Qalǵan jolaýshylar turǵylyqty jerlerine jetkizilip, úi karantinine alynady.
«Reistiń 85 jolaýshysy – oqýlaryn bitirgen stýdentter. Olardyń basym bóligi – «Bolashaq» baǵdarlamasynyń stipendiattary. Kelgenderdiń arasynda olardyń otbasy músheleri de bar. Shetelde jumys isteitin qazaqstandyqtar da keldi. Olardyń barlyǵy ushaqqa biletti óz qarajattaryna aldy», - dedi oblys ákiminiń orynbasary.
Málim etilgendei, Ulybritaniiadan ushyp shyǵarda qazaqstandyqtarǵa meditsinalyq tekseris ótkizbegen. Olar Petropavlǵa kelgennen keiin ǵana KVI-ǵa analiz tapsyrǵan.
«Reis jolaýshylary ornalasqan qonaqúi barlyq sanitarlyq-epidemiologiialyq talaptarǵa sai. Indettiń taralýyna jol berilmeidi. Iaǵni turǵyndarǵa qaýiptenýge negiz joq. Qonaqúidiń qyzmetkerleri jumys istep jatqan joq. Ol jerde tek meditsina mamandary ǵana eńbektenýde. Tamaq syrttan jetkiziledi. Ǵimarattyń ishinde de, syrtynda da politseiler kúni-túni kezekshilik atqaryp, kúzetedi. Qonaqúi tolyq oqshaýlanǵan», - dedi Rýslan Álishev.
Buǵan deiin qonaq úide ornalastyrylǵan London-Petropavl reisiniń jolaýshysy ózderine jasalǵan jaǵdai týraly aitqan edi.
Sońǵy málimetter boiynsha, SQO-da koronavirýs indeti jalpy 28 adamnan anyqtalǵan.
