Londonda Qazaqstannyń táýelsizdik kúni erekshe saltanatpen toilanyp, Erjan Maksim britaniialyq jurtshylyq aldynda óner kórsetti. «Junior Eurovision» baiqaýynyń laýreaty óziniń hit ánderin oryndap, saltanatty jiynǵa kelgen qaýymnyń zor qoshemetine ie boldy, dep habarlaidy "Ult aqparat".
Táýelsizdik toiyna qatysýǵa niet bildirgenderdiń sanynda shek bolmady. Barlyǵy da Qazaqstandy ulttyq merekesimen quttyqtap, jas talant Erjan Maksimniń ónerin tamashalaýǵa asyqty. Dástúr boiynsha Qazaqstannyń Ulybritaniiadaǵy elshisi Erlan Ydyrysov jubaiymen birge kelýshilerdi jeke qarsy aldy. Britaniialyqtar Qazaqstan táýelsizdiginiń 28-shi jyly eki el úshin óte jemisti bolǵandyǵyn aitady.
Ulybritaniianyń Qazaqstandaǵy elshisi Maikl Giffordyń sózine qaraǵanda, qos memleket qarym-qatynasy óte mańyzdy.
«Bul Ortalyq Aziiadaǵy eń eleýli naryq. Osy jyly biz Qazaqstanǵa shamamen 2,3 milliard sterling fýntyn eksporttadyq. Jáne biz Qazaqstandaǵy kólemi jaǵynan eń iri altynshy investormyz. Biraq tek saýda-ekonomikalyq áriptestik qana emes, mádeni almasý jáne adami qarym-qatynas ta mańyzdy. Búgingi Ulttyq mereke sonyń aiqyn aiǵaǵy», dedi elshi myrza.
Bul kúni Erjan Maksimniń óneri britaniialyqtar úshin naǵyz mádeni jańalyq boldy. Balalar jáne eresekter Eýrovijni Ulybritaniiada asa tanymal baiqaý emes. Biraq qonaqtar ánshi jaily habardar bolyp shyqty. Ásem daýysy men bekzat bolmysy bar jas daryn kópshilikti tańdai qaqtyrdy.
Múmkindikti paidalana otyryp, Erjan Maksim de otandastaryn merekemen quttyqtap:
«Qurmetti qazaqstandyqtar! Sizderdi kelip jetken búgingi táýelsizdik merekesimen shyn júrekten quttyqtaimyz. Árqashan aman bolyńyzdar. Árqashan kúlip-oinap júre berińizder. Elimiz aman, jurtymyz tynysh bolsyn» dedi.
Mádeni baǵdarlamany qazaqtyń ulttyq taǵamdary tolyqtyrdy. Qonaqtarǵa sondai-aq sarqyt ta berildi. Olar úilerine Almaty aportynan ala ketti.
.jpeg)