Ulybritaniia ishki ister ministri Priti Patel WikiLeaks saitynyń negizin qalaǵan Djýlian Assanjdy AQSh-qa ekstraditsiialaýdy maquldady. Assanj AQSh-ta 175 jylǵa deiingi merzimge sottalýy múmkin, - dep habarlaidy Bloomberg.
WikiLeaks ókilderi britan biliginiń sheshimine qarsy shaǵym túsiretinderin málimdegen. Al BBC agenttiginiń habarlaýynsha, Britan IIM Assanjǵa ózin AQSh-qa ekstraditsiialaý týraly sheshimge qarsy shaǵym túsirýine eki apta mursat berilgenin aitqan.
Sáýirde Vestminster magistrat soty Assanjdy AQSh-qa ekstraditsiialaýǵa ruqsat etken. Onyń aldynda London tóbe soty Assanjdy AQSh biligine bermeý týraly burynǵy sot sheshiminiń kúshin joiǵan. Budan keiin osy másele boiynsha túpkilikti sheshim qabyldaý Ulybritaniia ishki ister ministrligi quzyretinde edi.
AQSh-ta Assanjǵa barlyǵy 17 aiyp taǵylǵan. Olardyń arasynda Irak pen Aýǵanstandaǵy áskeri operatsiialar týraly qupiia málimetterdi jariia etý de bar. Ondai derekterdiń jylystaýyna sebepker negizgi adam – AQSh áskeri qyzmetkeri Bredli (Chelsi) Menning, al WikiLeaks ózine túsken qujattardy jariialap otyrǵan.
Aiyptaý qorytyndysynda Assanj "ózine aqparat bergenderdi, solardyń arasynda Menningti de qupiia aqparatty urlaýǵa jáne jariia etý úshin WikiLeaks-ke berýge birneshe ret itermelegen" dep jazylǵan.
Aiyptaý taraby Assanj álgindei aqparatty jariialap, "qupiia derekterdi jetkizgen adamdardy áshkereledi", solardyń arasynda AQSh-pen áriptestik bailanys ornatqan Aýǵanstan, Irak, Qytai men Iran azamattarynyń "ómiri qyl ústinde qalýyna" sebep boldy deidi.
WikiLeaks ókilderi bul aiyptaýlarǵa jaýap retinde: "Bul - essizdik jáne jýrnalistikanyń da, Birinshi túzetýdiń de qurdymǵa ketkeni" dep málimdedi. (AQSh Konstitýtsiiasynyń Birinshi túzetýinde sóz bostandyǵy jaily aitylǵan, onda "Kongress sóz nemese baspasóz bostandyǵyn shekteitin bir de bir zań shyǵarmaýy kerek..." dep jazylǵan – red.)
Assanjǵa AQSh-ta taǵylyp otyrǵan barlyq aiyp boiynsha jiyntyǵy 175 jylǵa jetetin túrme jazasy qarastyrylǵan dep jazady Financial Times basylymy.
Al adam quqyǵyn qorǵaityn halyqaralyq uiymdar - Amnesty International, Human Rights Watch jáne Reporters Without Border ("Shekarasyz tilshiler") Assanjdy ekstraditsiialaýǵa qarsy shyqqan.
