Eýraziialyq ekonomikalyq odaq aiasyndaǵy saýda kedergilerin joiý qajet. Bul týraly Joǵary eýraziialyq ekonomikalyq keńestiń otyrysynda Qazaqstan Prezidenti Qasym-Jomart Toqaev aitty, dep habarlaidy QazAqparat.
«Bizge merzimi jetken problemany – ózara saýdadaǵy kedergini sheshý qajet. Lokdaýn kezeńinde olardyń sany artyp ketti. Ekonomikalyq belsendilik qalpyna kelgennen keiin de ol ózdiginen joiylyp ketpeitindigine qaýip te bar. Atalǵan shekteýler saýda-ekonomikalyq qarym-qatynastyń damýyna ziianyn tiigizedi, odaqtyń ósimi men damý áleýetin shekteidi», - dedi Qazaqstan Prezidenti.
Memleket basshysy Qazaqstan jáne odaqqa múshe qalǵan elder naryq qatysýshylarynyń barlyǵy úshin teń múmkindik jasaýdy ári kemsitýshilik jaǵdailar boldyrmaýdy qoldaidy.
«Komissiianyń kedergilermen kúresi toqtaýsyz sipatqa ie. Biraq, bul jumysty erekshe tiimdi dep aita almaisyń. Bul - ulttyq deńgeide saldardy sheshýmen kúres. Osylai aitýǵa bolatyn bolsa, onda barynsha preventivti odaqtyq pozitsiiany ekonomikalyq integratsiiaǵa jaýapty ministrlikter bildirýi tiis dep sanaimyz. Atalǵan kedergiler men shekteýler engiziletin tiisti normativtik-quqyqtyq aktilerdi ázirleý kezeńinde qarsylyq bildirip, qorǵaý qajet. Bizge kedergilerdi monitoringileýdiń ulttyq júiesin qurý jáne odaqtyń ishki normativtik-quqyqtyq aktilerine sáikestigin oilastyrý qajet. Bul rette de keńes, komissiia músheleriniń, vitse-premerlerdiń, Úkimettiń róli úlken», - dedi Qasym-Jomart Toqaev.
