Resmi Kiev Donbassta beibitshilik ornatýǵa qatysty birneshe málimdeme jasady. Buǵan qosa Ýkraina Prezidenti Vladimir Zelenskii bir jylda sol jerdegi shielenisti sheshýge ýáde berdi. Óz egemendigin jariialaǵan Lýgansk halyq respýblikasynyń basshysy Leonid Pasechnik el bul ýádelerdi qalai qabyldaǵanyn aityp berdi.
"Biz Donbassta beibitshilik ornatýǵa qatysty qandai da bir jańa josparlar jaily estip jatamyz. Bul - jańa saiasi sánniń bir bóligi ispetti. Buryn Ýkraina saiasatkerleri Donbass halqyn joiý ádisterin sýrettegende aldyna jan salmaityn. Odan keiin Ýkraina bolashaǵyna qatysty óz oilaryn aitty. Al endi kúzde shielenisti retteý josparyn usyný ýaqyty keldi", - dedi Leonid Pasechnik RIA Novosti agenttigine bergen suhbatynda.
Lýgansk halyq respýblikasy basshysynyń aitýynsha, ár sanaly adam Ýkraina "Minsk formatynan" attap óte almaitynyn túsinedi.
"Basqa amal men jol izdep, túrli syltaý oilap taýyp, "normand formaty" taqyrybynda qaljyńdai salý endi qoldan kelmeidi. Sharalar kesheni – bul oqý men este saqtaýǵa bolatyn aksioma. Onda barlyǵy túsinikti etip, retimen jazylǵan. Sondyqtan Zelenskiige ózi úshin basqalar oilap, jazyp bergen nusqaýdy ret-retimen oryndaý jetkilikti bolyp tur. Eger istei alsa – beibitshilik ornaidy, istei almasa – úmit syilaǵan prezident bop qala beredi", - dep senimmen aitty Pasechnik.
Minsk formaty
Minsk kelisimderin oryndaý boiynsha keshendi shara 2015 jylǵy 11-12 aqpanda Minskte ótken sammitte kelisilgen. Ol boiynsha Germaniia, Frantsiia, Ýkraina men Resei basshylary "normand tórttigi" formatynda kelisimge kelgen bolatyn. Qujat maqsaty – Ýkraina shyǵysyndaǵy qarýly qaqtyǵysty retteý.
