Muhtar Áýezovtiń litva tilinde qaita basylyp shyqqan «Abai joly» roman-epopeiasynyń jáne Ánýar Álimjanovtyń «Ustazdyń oralýy» povesiniń tusaýkeseri ótti, dep habarlaidy QR SIM baspasóz qyzmeti.
Beinekonferentsiia formatynda ótken tusaýkeserge Abai atyndaǵy Shyǵys Qazaqstan oblystyq ámbebap kitaphanasy men ál-Farabi atyndaǵy QazUÝ-dyń baspa úiiniń basshylyǵy, A. Mitskevich atyndaǵy Vilniýs oblystyq qoǵamdyq kitaphanasynyń jáne E. Simonaitite atyndaǵy Klaipeda oblystyq qoǵamdyq kitaphanasynyń direktorlary, Litva qaýymdar úii jáne Litva jýrnalister odaǵynyń tóraǵalary, Litvanyń iri joǵary oqý oryndarynyń, qazaq diasporasynyń, sondai-aq Litvanyń BAQ ókilderi qatysty.
Tusaýkeserdi ashqan Qazaqstan Elshisi Viktor Temirbaev atalǵan eki shyǵarmany Qazaqstan Ulttyq Akademiialyq kitaphanasy elimizde jalpyǵa ortaq oqýǵa arnalǵan jyldyń bas kitaptary retinde tanylǵanyn baiandap ótti. Osyǵan orai, litvalyq oqyrmandar Abaidyń biregei álemin jáne «Ekinshi ustaz» Ábý Nasyr ál-Farabidiń murasymen ana tilinde tanysa alady.
Is-sharaǵa qatysýshylar qazaqstandyq kórkem ádebiettiń eki jaýhary litvalyq oqyrmandardyń qazaq halqynyń mádenieti men tarihy, onyń jany men taǵdyry týraly túsinigin keńeitýge yqpal etetinine senim bildirdi.
A.Mitskevich atyndaǵy Vilniýs oblystyq qoǵamdyq kitaphanasynyń direktory Emiliia Banionite «Abai joly» romanynyń Litva tilindegi jańa basylymy biyl kúzde atalǵan kitaphanada ashylǵan Abai atyndaǵy oqý zalynyń injý-marjany bolatynyn atap ótti.
«Abai joly» romanynyń qaita basylyp shyǵý tarihyn eske ala otyryp, litvalyq baspager Aidas Jandaris qazaqstandyq sýretshi Evgenii Sidorkin áýletine 1960 jyly romannyń alǵashqy basylymyna arnaiy jasalǵan túpnusqa illiýstratsiiasyn kitapta qoldanýǵa múmkindik bergeni úshin alǵys aitty.
Eki kitap Litvanyń barlyq oblystyq jáne basqa da iri kitaphanalaryna syiǵa beriledi, olardyń birqatarynda qazirdiń ózinde qazaq ádebietiniń buryshy qalyptasqan.
Sonymen qatar, 2021 jyly qazaq klassikteri eńbekteriniń kezekti tusaýkeseri óńirdegi eń iri, jyl saiynǵy «Vilnius Book Fair» kitap kórmesinde josparlanǵan.
