Litva amerikalyq Amazon internet kompaniiasyn oraq pen balǵa jáne ózge de sovettik simvol salynǵan taýarlardy satpaýǵa shaqyrdy. Vilniýs mundai simvoldy taratý sovettik rejim qurbandaryn qurmettemeý bolady dep sanaidy.
Arasynda burynǵy SSSR yqpalynda bolǵan elderdiń ókilderi de bar Eýroparlamenttiń 27 depýtaty ashyq hatta búginde kelmeske ketken Sovet odaǵymen bailanystyrylatyn oraq pen balǵa belgisi bar taýarlardy Amazon platformasynda satýdy doǵarýdy talap etken. Hatta álgindei belgi mysaly, jeidelerde, kostiýmderde, týlar men kádeisyi retinde satylatyn taýarlarda bary aitylǵan.
"Bizdiń planetamyzda zombylyq tarap jatyr, sondyqtan eshkim de ondai simvoldarǵa, tipti "kúlkili" bop kórinse de, bei-jai qaramaýy tiis" dep jazǵan Amazon kompaniiasyn qurǵan Djeff Bezosqa Litvanyń burynǵy prezidenti Vitaýtas Landsbergis.
Litvany Sovet odaǵy taraityn tusta basqarǵan 86 jastaǵy Landsbergis amerikalyq kásipkerdiń nazaryn Amazon kompaniiasy saýdaǵa shyǵarǵan zattar arasyndaǵy "áskeri qylmystar jasap, gitlerlik rejimmen birge genotsid júrgizgen SSSR-diń kommýnistik zulymdyq" simvoldaryna aýdarǵan.
Litva syrtqy ister ministri Linas Linkiavichiýs burynǵy prezidenttiń hatyna qoldaý bildirip, Amazon kompaniiasynan sovet simvoldary bar zattardy saýdadan alyp tastaýdy surap diplomattar da ótinish jasaǵanyn aitty dep habarlaidy AFP.
Landsbergis bul hatyn SSSR men natsistik Germaniia arasynda jasalǵan "Molotov - Ribbentrop" paktisine qol qoiylǵanyna 80 jyl tolar qarsańynda jazdy. Atalǵan paktige sáikes, 1939 jyly Sovet odaǵy men Germaniia Shyǵys jáne Ortalyq Eýropany ózara bóliske salýǵa kelisken. Osy qujatqa qol qoiylǵannan keiin 1940 jyly sovet áskeri Litva, Latviia men Estoniiany basyp alyp, bul úsh eldi SSSR quramyna kirgizgen.
