Lisakovtaǵy turǵyn úidiń kireberisinde er adam atys shyǵardy, dep habarlaidy "Ult aqparat" Qostanai oblysynyń politsiia departamentiniń baspasóz qyzmetine silteme jasap.
Qalanyń №3 shaǵyn aýdanyndaǵy №18 kópqabatty úidiń aýlasynda belgisiz bireý oq atqan.
«Búgin saǵat 11:00 shamasynda Lisakov politsiia bóliminiń 102 pýltine 3-shaǵyn aýdan turǵyn úiiniń aýlasynda belgisiz bireý qarýmen júrgeni týraly habarlama kelip tústi. Oqiǵa ornyna jedel-tergeý toby dereý jiberildi. Kúdikti kelgen politsiia qyzmetkerlerine qarai oq atyp, saldarynan jedel-tergeý tobynyń tergeýshisi jaraqat aldy. Artynsha kúdikti úidiń kireberisinde jasyrynǵan. Qýdalaý barysynda ol tártip saqshylaryna oq atýdy jalǵastyrdy. Turǵyndardyń qaýipsizdigi jáne kúdiktini ustaý úshin politsiia qyzmetkerleri qarý qoldanýǵa májbúr boldy jáne kúdikti jaraqat aldy. Izinshe jaraqat alǵan adam óz páterine qashyp, sol jerde ustaldy. Úidiń kireberisinde jaraqaty bar eki áiel anyqtaldy», - dep habarlaidy atalǵan vedomstvodan.
Habarlamada aitylǵandai, ishki ister qyzmetkerleri zardap shekkenderge kómek kórsetý úshin oqiǵa ornyna jedel járdem shaqyrǵan.
«Alǵan jaraqatynan ustalǵan kúdikti aýrýhanada kóz jumdy. Sonymen qatar, jaraqat alǵan áielderdiń biri qaitys boldy. Qazirgi ýaqytta qajetti tergeý áreketteri júrgizilip, óz kezeginde Prokýratýra organdary qarýdy qoldanýdyń zańdylyǵyn zerttep jatyr. Aldyn ala tergeý nátijesinde belgili bolǵandai kórshiler arasyndaǵy qandy oqiǵa úige jóndeý jumysyn jasaýǵa qatysty máseleden týyndaǵan. Máseleni sheshý maqsatynda 66 jastaǵy zeinetker qolyna qarý alǵan»,- delingen habarlamada.
