Búgin májilistiń jalpy otyrysynda tómengi palata tóraǵasy Nurlan Nyǵmatýlin zań jobasyn ázirleýge atústi qaraityn ministrlerdi synǵa aldy, dep habarlaidy Sputnik Qazaqstan tilshisi.
Májiliste QR keibir zańnamalyq aktilerine biznes-ortany damytý jáne saýda qyzmetin retteý máseleleri boiynsha ózgerister men tolyqtyrýlar engizý týraly zań jobasy birinshi oqylymda qaraldy. Ulttyq ekonomika ministrligi ázirlegen zań jobasynda qazaqstandyq taýarlardy tańbalaý men zatbelgi japsyrý boiynsha ortalyqtar qurý usynylǵan. Alaida dál osy zań jobasymen tańbalaý men zatbelgi japsyrý fýnktsiiasyn atqaratyn biryńǵai operator qurý da kózdelip otyr. Osy oraida Nurlan Nyǵmatýlin atalǵan qujatty ázirlegen úkimet múshelerinen kásipkerlerden aqsha sypyratyn deldal qurý ne úshin qajet bolǵanyn surady.
"Ulttyq ekonomika ministrligi men qarjy ministrligi zań jobasynda osyndai ortalyqtar qurýdy usynǵanda, neni basshylyqqa alyp otyr? Áriptester, bul ortalyqtardyń artyq ekeni kórinip tur emes pe? Sizder, deldal qurýdy usynyp otyrsyzdar. Timýr Muratuly, munyń jekemenshik kompaniialar bolatynyn aitty. Olar kásipkerlerden tek aqsha jinaýmen ainalysatyny anyq qoi", — dep ashýlandy Nyǵmatýlin.
Osydan keiin májilis spikeri tańbalaý ortalyqtaryn qurýǵa qatysty "Atameken" ulttyq kásipkerler palatasynyń pozitsiiasy qandai ekenin surady.
"Eger tańbalaý men zatbelgi japsyrý fýnktsiiasyn biryńǵai operator júzege asyrsa, onda ortalyqtar, tiisinshe, kerek emes. Biraq, Nurlan Zairollauly, ortalyqtar óz taýaryn tańbalaýǵa múmkindigi joq shaǵyn jáne orta biznes kásipkerlerine qyzmet kórsetý úshin qurylady. Iaǵni, erkin negizde. Biraq, eger, tańbalaý fýnktsiiasyn biryńǵai operator oryndai alatyn bolsa, árine, onda bul normany alyp tastaýǵa bolady", — dedi "Atameken" UKP basqarma tóraǵasynyń orynbasary Eldos Ramazanov.
Zań jobasynda kórsetilgen biryńǵai operator tańbalaý men zatbelgi japsyrý fýnktsiiasyn oryndai alatynyn ulttyq ekonomika ministri Timýr Súleimenov te rastady.
"Áriptester, olai bolsa, bizge deldal ne úshin kerek? Onyń ústine, zań jobasynda sizder ortalyq degen túsinikti ǵana engizip otyrsyzdar,al onyń mindetteri men fýnktsiialary týraly biraýyz sóz joq. Sizder qaraptan-qarap kásipkerlerden aqsha jinaityn deldal qurýdy usynyp otyrsyzdar. Bul máseleni qaita qaraý kerek", — dedi májilis tóraǵasy.
Súleimenov ekinshi oqylymǵa deiin atalǵan norma jiti zertteletinin atap ótti.
"Biryńǵai operator bolsa, biz artyq deldaldardy alyp tastaimyz, árine", — dedi ministr.
Nyǵmatýlin pozitsiiasyn jyldam ózgertken Súleimenovti synǵa aldy.
"Keide mende mynadai oi qalyptasady: sizder úkimette zań jobasyn ázirlegende, máselege tereń boilamaisyzdar. Tek parlament zań jobasyn jumysqa qabyldap, depýtattar túzetý engizý kerektigin aitqanda ǵana, lezde ózgerip sala beresizder. Quddy, bolidiniń shinasyn júrip bara jatyp aýystyratyn "Formýla-1" shabandozdary sekildi. Parlamentke kelip alyp, ózderińiz ázirlegen zań jobasyna túzetý engizip, pysyqtaisyzdar. Bul sizderdiń jumysqa atústi qaraitynyńyzdy kórsetip otyr", — dedi májilis tóraǵasy.
Nyǵmatýlin ekinshi oqylymǵa deiin zań jobasynda biryńǵai operatorǵa qoiylatyn talaptardy bekitip, artyq deldaldardy alyp tastaý qajettigin aitty.
