Bokstan Qazaqstan erler quramasynyń bas bapkeri Ǵalymbek Kenjebaev Tokio Olimpiadasyna qatysatyn boksshylardyń jerebe qorytyndysy boiynsha pikir bildirdi, dep habarlaidy QazAqparat.
«Jerebe tartý rásimi jańa ǵana aiaqtaldy. Úsh sportshymyz jerebe boiynsha tarqatylǵan sebetke tústi. Halyqaralyq Olimpiada komitetiniń óz reitingisinde alǵashqy tórttikte turǵan boksshylardy jartylai finalǵa deiin bir-birimen jolyqpaityndai etip tarqatyp bólip tastady. Sonyń ishinde bizdiń úsh boksshymyz bar. 81 kelidegi Bekzat Nurdáýletov birinshi reitingte tur. 91 kelide Vasilii Levit ekinshi nómir bolyp tur. Eń aýyr salmaqta Qamshybek Qońqabaev ta óz salmaǵynda ekinshi nómirde tur. Solar jartylai finalǵan deiin reitinginiń tórttigindegi boksshylarman jartylai finalǵa deiin jolyqpaityndai etip bólindi. Biraq Olimpiadada ońai jekpe-jekter bolmaidy. Árine, sportshylardyń bári myqty daiyndyqpen keldi. Jerebe osylai túsip tur. Qalǵanyn ring kórsetedi», - dedi bas bapker.
Sondai-aq, ol buǵan qarap álemdik reitingtiń alǵashqy satysynda turǵandarǵa jerebe joldas boldy dep aitýǵa kelmeitinin eskertti.
«Bul jerde boksshylardyń birine jerebe joldas boldy, ekinshisine jeńil boldy dep aitýǵa kelmeidi. Mysaly, jańaǵy tarqatylǵan sebettegi Vasilii Levittiń birinshi ispandyq qarsylasy da ońai sportshy emes. Al kelesi ainalymda Hýlio la Krýzben túsýi múmkin. Tarqatylǵan sebetke bizdiń ǵana emes, álemniń tańdaýly boksshylary da kirmei qalǵan. Olimpiada chempiony, sońǵy Álem chemipionatynyń jeńimpazy ózbekstandyq Zairov ta tarqatylǵan sebetke túsken joq. Olimpiada komiteti óz reitingisin jasap, sonyń qorytyndysy boiynsha tarqatyp otyr. Óte myqty boksshylardyń talaiy nómir alǵan joq. Hýlio la Kýrz da solai. Ispandyqty jeńip jatsa, Vasilii Hýlio la Krýzben shyǵýy múmkin.
Jerebe qorytyndysy bir qaraǵanda jaman emes bolyp kóringenimen, ekinshi jaǵynan kúrdeli bolyp tur. Sondyqtan osyndai sátter bar. Ring kórsetedi. Jarys bastalǵanda kóremiz bárin», - dedi Ǵalymbek Kenjebaev.
