Reseidiń syrtqy ister ministri Sergei Lavrov jergilikti "Pervyi kanal" telearnasyna bergen suqbatynda, "qazir iadrolyq soǵys qaýpi shynymen bar ekenin jáne ol qaýipti jetkilikti deńgeide baǵalamaýǵa bolmaitynyn" aitty, dep habarlaidy "Ult aqparat".
Soǵan qaramastan ministr, Máskeý iadrolyq soǵysqa jol joq degen ustanymda ekenin atap ótti.
"Bul – naqty ustanymymyz. Biz osyny negizge alamyz. Árine, men mundaidy qalamas edim. Qurmetti saiasattanýshylarǵa silteme jasai otyryp aitqanyńyzdai, táýekelder aitarlyqtai jáne edáýir bolǵandyqtan, men bul táýekelderdiń jasandy túrde tutatylǵanyn qalamas edim, ony qalaityndar az emes. Qaýip bar, ol shynaiy, ony elemeý múmkin emes" dedi Lavrov.
Sarapshylardyń kóbi Resei Ýkrainaǵa basyp kirgende eldi sanaýly kúnde basyp alýdy josparlady degen pikir aitady. Biraq Ýkraina qarýly kúshteri toitarys berip, soǵys úshinshi aiǵa ulasyp otyr.
Álemniń damyǵan, demokratiialyq elderi osy soǵysty bastaǵany úshin Reseige qarsy ekonomikalyq sanktsiialaryn kúsheitip, Ýkrainaǵa qarjylai da, áskeri tehnikamen de kómek kórsetip keledi.
Qazir álem elderi arasynda jyldam jeńiske jete qoimaǵan Resei taktikalyq iadrolyq qarý qoldana ma degen alań bar. Ol alańdy Kremldiń kei qadamdary kúsheitip otyr. Atap aitqanda, soǵys bastalǵaly Resei resmi túrde iadrolyq qarýlaryn joǵary daiyndyq deńgeiine ótkizetinin málimdedi. Ótken aptada "Sarmat" qurlyqaralyq ballistikalyq zymyranyn synaqtan ótkizdi. Mundai zymyrandy iadrolyq shabýylǵa qoldanýǵa bolady.
Buǵan deiin amerikalyq sarapshy alpaýyt derjavalar arasyndaǵy iadrolyq qarý jarysy adamzatqa baqylaýsyz áskeri qaqtyǵys qaýipin tóndiretinin aitqan. Ol qazir iri derjavalar arasynda iadrolyq básekelestiktiń jańa raýndy júrip jatqanyn, bolashaqta ol dúniejúzilik iadrolyq soǵystyń tutanýyna ákelýi múmkin ekenin atap ótti.
