Máskeý Ortalyq Aziiadan AQSh áskerin kórgisi kelmeidi. - Eger Ortalyq Aziiada AQSh áskeri júrse, onda bul aimaq shabýyl nysanasyna ainalady, - dep málimdedi Resei Syrtqy ister ministri Sergei Lavrov.
24 tamyzda Býdapesht qalasynda Vengriia Syrtqy ister ministrimen kelissózden keiin jýrnalister aldyna shyqqan Lavrov Reseidiń Ujymdyq qaýipsizdik sharty kelisimi boiynsha Ortalyq Aziiadaǵy postsovettik respýblikalarmen "ortaq qaýipsizdik keńistigi" bar ekenin eske saldy. Atalǵan áskeri aliansqa Qazaqstan, Qyrǵyzstan, Tájikstan, Armeniia, Belarýs jáne Resei kiredi.
Lavrovtyń sózinshe, Aýǵanstan bosqyndaryn bul aimaqqa ornalastyrý týraly AQSh-tyń usynysy Ortalyq Aziiadaǵy turaqtylyqqa qater tóndiredi.
Resei Syrtqy ister ministri Ortalyq Aziia elderi AQSh áskerin ornalastyrýǵa kelise qalsa, sol sátten bastap-aq shabýyl nysanasyna ainalady" dep sanaidy.
Lavrovtyń aitýynsha, Resei Qytai, AQSh jáne Pákistanmen birge Aýǵanstandaǵy qazirgi daǵdarysty retteýge qatysýǵa daiyn.
15 tamyzda tálipter Kabýldy soǵyssyz alǵan soń, Aýǵanstanda tolyq baqylaý ornatqanyn jariialaǵan. Oǵan deiin Aýǵanstan prezidenti Ashraf Ǵani shetelge shyǵyp ketken.
