Prezidenttiń kadr rezervine engen «Bolashaq» qaýymdastyǵynyń atqarýshy direktory Laýra Demesinova aldaǵy josparymen bólisti, dep habarlaidy QazAqparat tilshisi.
«Úzdik úsh júz azamattyń arasynan oryn alý – bárimiz úshin zor maqtanysh, sebebi iriktelgender tizimine ene otyryp, halyq pen memleket úshin eńbek etý múmkindigine ie bolyp otyrmyz. Memleket basshysy bizben kezdesken sátinde kadrlyq rezervke engen jastardy jaýapty qyzmetke kelýin qalaitynyn, bilimdi ári talapty azamattarǵa úlken úmit artyp otyrǵanyn aityp ótti. Qazaqstannyń damýyna aianbai úles qosatynymyzǵa senim bildirdi. Ómirimniń keiingi úsh aiyn saralap, taldasam qyzmet jolynda birshama synaqta júrippin. Emtihandardan óte júrip, elimizdiń ár óńirinen jańa dos taptyq. Sol dostarymmen keleshekte el úmitin aqtap, memlekettiń múddesi úshin barymdy salǵym keledi», - dedi Laýra Demesinova.
«Bolashaq» qaýymdastyǵynyń atqarýshy direktory qazaq tarihynda bilimdi jáne bilikti azamattarynyń ortaq múddege toptasqanyn aityp ótti.
«Máselen, alashordashylar el úshin eńbek etken ultty biikke jeteleitin, jańasha damýǵa bastaityn shoǵyr qalyptastyrdy. Osy oraida, Prezidentimizdiń Alash ardaqtysy Álihan Bókeihannyń «Ultqa qyzmet etý bilimnen emes, minezden» dep aitqanyn tilge tiek etýi beker emes. Sol kezeńde halyq úshin aianbai eńbek etkenderdiń basym bóligi «orda buzar» jastyń ainalasyndaǵy jastar ekenin kóremiz. Endeshe, Prezidenttiń kadrlyq rezervin uiymdastyryp, jastardy jaýapty qyzmetke taǵaiyndaý jańa serpin beretini anyq. Memleket basshysynyń tizimge engen jastarmen kezdesýinde «Memlekettik basqarýdaǵy kez kelgen ózgeris muqiiat zerdelengen, uzaq merzimdi strategiiaǵa sai júrgizilýi kerek. Kadrlyq saiasat munda mańyzdy rólge ie. Bul – eń aldymen, memlekettiń jańa kadrlyq saiasatyna qatysty másele. Onyń basty mindeti – memlekettik apparatty jetildirý jáne basshylardyń jańa býynyna jol ashý. Prezidenttik kadr rezerviniń negizgi kózdegen maqsaty da – osy. Búgingi jastar – memlekettik basqarý júiesiniń bolashaǵy. Árqaisyńyzdan eldi damytýǵa tyń serpin beretin jańa ideia men nátijeli jumys kútemiz» deýi de kóp nárseni ańǵartady», - deidi ol.
Laýra Demesinova qazirdiń ózinde rezervke ótken elý bes azamat jańa qyzmetke bekitilgeninen habardar ekenin atap ótti.
«Maǵan da túrli usynys keldi. Ázirge oi ústindemin. Aldaǵy ýaqytta rezervke engender memlekettik organdar men ulttyq kompaniialarǵa jaýapty qyzmetke jiberilmek. Endeshe, kadrlyq rezervtiń áleýetin tolyq paidalanýǵa zor múmkindik bar», - dep túidi Laýra Demesinova.
Eske sala ketsek, osydan birneshe kún buryn Memleket basshysy Qasym-Jomart Toqaev Prezidenttiń kadr rezervine engen 300 jaspen kezdesý ótkizgen bolatyn. Jiynda Qasym-Jomart Toqaev el jastaryna úndeý joldady.
.jpeg)