Laýazym ieleriniń qyzmeti týraly pikir aityp, synaýǵa kez kelgen azamattyń, jýrnalistiń quqyǵy bar. Bul jóninde aqparat jáne kommýnikatsiialar máseleleri boiynsha ózgerister men tolyqtyrýlar engizý týraly zań jobasyn talqylaý barysynda senat depýtaty Murat Baqtiiaruly aitty, dep habarlaidy "Ult aqparat" Sputnik Qazaqstan-ǵa silteme jasap.
"Aqparat jáne kommýnikatsiialar ministrliginiń nazaryn mynadai usynystarǵa aýdarǵym keledi. Birinshiden, elimizdegi aqparat quraldarynyń menshik nysanyna qaramastan eń basty derekkózi — resmi aqparat. Onsyz jańalyqtardyń da, taldaý maqalalarynyń da mańyzy joq. Sondyqtan da resmi aqparattardy BAQ qyzmetkerlerine jedel, tez arada usynýǵa barlyq memlekettik organnyń ózderi múddeli bolýy tiis. Sebebi qoǵamda túrli alypqashpa áńgime, túrli dúrbeleń etek jaiyp ketpeýi úshin jýrnalist resmi derekkózderge negizdep qana shynaiy aqparat tarata alady. Jurt oqiǵanyń jai-japsaryn resmi derek arqyly ǵana bilip, shyndyqqa kóz jetkize alýy tiis", — dedi depýtat zań jobasyn talqylaý barysynda.
Aitýynsha, kóptegen memlekettik organnyń internet-saittary der kezinde jańa málimettermen ýaqytyly jańartylyp otyrmaidy.
"Bul óz kezeginde tek jýrnalister tarapynan ǵana emes, memlekettik organdarǵa, aýdan, qalaǵa qatysty qajetti jańa aqparattardy der kezinde almaǵandyqtan turǵyndar tarapynan da narazylyq týdyrady. Osy másele rettelýi kerek", — dedi ol.
Budan bólek, ol BAQ ókilderi arasynda otbasylyq, dárigerlik, kommertsiialyq qupiialarǵa qatysty úlken pikirtalas týdyrǵan zań jobasyndaǵy bapqa da toqtaldy.
"Ekinshiden, talqylanyp otyrǵan zańnyń jiyrma birinshi babynyń birinshi, ekinshi jáne úshinshi tarmaqshasyna qatysty jýrnalister tarapynan ár túrli pikirler aitylýda. Árine, árbir azamattyń jeke otbasylyq, dárigerlik, kommertsiialyq, taǵy basqa zańmen qorǵalatyn qupiialaryn taratý úshin kelisim alǵan durys. Alaida buqaralyq aqparat quraldary elimizdegi sybailas jemqorlyqpen kúres júrgizýde eń bir tiimdi qural ekenin eskere otyryp, álde de bolsa azamattar men BAQ múddeleriniń teńdigin saqtaýdyń tetigin qalyptastyrý kerek dep sanaimyn. Óitkeni laýazym ieleriniń qyzmeti týraly pikir aitýǵa, synaýǵa kez kelgen azamattyń, jýrnalistiń quqyǵy bar. Sóz bostandyǵy, ómir salty, biraq ol memleket múddesine qyzmet etý kerek. Bul demokratiianyń altyn zańy", — dep túidi sózin senator.
