Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl máseleleri boiynsha ózgerister men tolyqtyrýlar engizý týraly» Zańy qabyldandy, dep habarlaidy QazAqparat.
Zań jobasyna QR Parlamentiniń depýtattary bastamashylyq jasady.
Zań jobasy kiristerdi jylystatýǵa jáne terrorizmdi qarjylandyrýǵa qarsy is-qimyldyń ulttyq júiesin jaqsartý, sondai-aq Aqshany jylystatýǵa qarsy kúrestiń qarjylyq sharalaryn ázirleý tobynyń (FATF) halyqaralyq standarttaryn iske asyrý maqsatynda ázirlendi.
Senattyń Qarjy jáne biýdjet komitetiniń qorytyndysyna qaraǵanda, «Jariia laýazymdy adamdar» uǵymy engiziledi, ol ulttyq jáne sheteldik memlekettik laýazymdy adamdarǵa bólinedi. Bul rette Agenttik ulttyq jariia laýazymdy adamdardyń tizimin júrgizetin bolady, olardyń tizbesin Qazaqstan Respýblikasynyń Prezidenti bekitedi.
«Tsifrlyq aktivter (qamtamasyz etilgen) salasynda óz qyzmetin júzege asyratyn tulǵalardy QR Tsifrlyq damý, innovatsiialar jáne aeroǵarysh ónerkásibi ministrligine baqylaý-qadaǵalaý fýnktsiialaryn aiqyndai otyryp, osyndai sýbektiler úshin týyndaityn aqparattandyrý salasyndaǵy ýákiletti organdy óz qyzmetiniń bastalǵany týraly habardar etý mindettemelerin engize otyryp, qarjy monitoringi sýbektileriniń qataryna jatqyzý usynylady. Oiyn biznesi boiynsha shekti mándi 3 mln teńgeden 1 mln teńgege deiin, sondai-aq jyljymaityn múlikpen mámileler boiynsha 200 mln teńgeden 50 mln teńgege deiin tómendetý usynylady, bul kiristerdi zańdastyrý jáne terrorizmdi qarjylandyrý salasyndaǵy kóleńkeli ortada jasalatyn qylmysty anyqtaýǵa múmkindik beredi», - delingen komitet málimetinde.
«Jobada elimizdegi laýazymdy tulǵalardyń aqshamen jáne ózge múlikpen jasaityn operatsiialary boiynsha tiisti baqylaýdy zańnamalyq deńgeide belgileý kózdelgen. Al qarjy monitoringi agenttigi, óz kezeginde osy adamdardyń jáne otbasy músheleriniń, jaqyn týystarynyń jeke tizimin júrgizetin bolady. Sondai-aq, jobada tsifrlyq aktivterdi shyǵarý, olardyń saýda-sattyǵyn uiymdastyrý, osy aktivterdi aqshaǵa, ne bolmasa basqa múlikke aiyrbastaý jónindegi qyzmetterdi júrgizetin tulǵalardy, qarjy monitoringi sýbektilerine jatqyzý qarastyrylǵan. Mekemeniń zańdy iesi týraly málimetterdiń ashyqtyǵyn belgileý maqsatynda ýákiletti organǵa ulttyq tiziliminiń derekterine qol jetkizý usynylǵan», - dedi senator Baqtybai Shelpekov
Osy zań jobasymen, Qazaqstan Respýblikasynyń tórt zańyna tiisti ózgerister men tolyqtyrýlar engiziledi.
