Búgin Nur-Sultan qalasynda Qazaqstan Respýblikasy Mádeniet jáne sport ministrligi Til saiasaty komiteti Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy uiymdastyrǵan «Jańa emleni oqytý ádistemesi» atty latynnegizdi qazaq jazýyn meńgertetin respýblikalyq oqytý bastaldy.
Qazaqstan Respýblikasy Mádeniet jáne sport ministrligi Til saiasaty komitetiniń tóraǵasy Qýat Borash: Qazaq jazýynyń búgini men bolashaǵy úshin atqarylyp jatqan jumystardyń memlekettik tildiń mártebesin arttyrýdaǵy róli airyqsha ekendigin, respýblika kóleminde jańa grafikamen jazylǵan jazba tilimizdiń júiesin, emle normalarynyń ǵylymi negizin túsingen, tanyǵan jáne ony ózgege túsindire alatyn bilikti mamandar daiarlaý sharalary qolǵa alynyp jatqandyǵyn aita kele ,qatysýshylarǵa sáttilik tiledi.
Al, sóz kezeginde Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵy bas direktorynyń mindetin ýaqytsha atqarýshy Erbol Tilesh kýrsqa jinalǵan tyńdaýshylarǵa: «Jańa jazýdy meńgerý barysynda árbir adamnyń aldynda, eń aldymen, barynsha jyldam ári saýatty jazý jáne qarqyndy oqý daǵdysyn qalyptastyrý qajettiligi týyndaityny belgili. Sol sebepti jańa emlege sáikes túzilgen tapsyrmalar júiesi, negizinen, jazylym jáne oqylym daǵdylaryn meńgertýge baǵyttalady. Jazylym tapsyrmalary qoldaǵdy qalyptastyra otyryp, emle erejelerin meńgertýge kómektesse, oqylym tapsyrmalary kózdaǵdy qalyptastyrý arqyly qarmap oqýǵa baýlidy. Sonymen qatar oqylym tapsyrmalary orfoepiia zańdylyqtaryn meńgertý maqsatyn kózdeidi»- dep sharanyń mańyzdylyǵyna toqtaldy.
Kýrs barysynda «Til-Qazyna» ulttyq ǵylymi–praktikalyq ortalyǵynyń Orfografiia basqarma basshysy Anar Fazyljanova: «Ulttyq sanany jańǵyrtýdaǵy jazýdyń róli» jáne «Aýyzsha til men jazbasha tildiń araqatynasy» taqyrybynda dáris oqyp, qatynasýshylarmen jańa ádis-tásildermen bólisti.
Sondai-aq, kelesi sabaqtarda kýrsqa qatynasýshylarǵa jańa qazaq álipbiiniń fonologiialyq negizderi, grafikasy men quramy, tól jáne kirme, birge jáne bólek, kúrdeli jáne qysqarǵan sózderdiń, defispen jazylatyn sózderdiń emlesi, shettildik sózderdiń orfografiiasy men orfoepiiasy, jańa álipbidi meńgertýdegi jańa IT jobalar týraly aýqymdy aqparat beriledi.
Respýblikanyń túpkir-túpkirinen kelgen oqý ortalyqtarynyń oqytýshylary men ádiskerleri kýrs barysynda jan-jaqty bilim alady jáne jergilikti jerlerde emle erejege sai eresekterdi oqyta alatyn dárejege ie bolady degen senimdemiz.
