Latyn qarpindegi qazaq álipbiine ótý – jańa tehnologiialardy igerýge kómektesip, oǵan qosa aǵylshyn tilin meńgerýge de kómegin tigizedi. Almaty oblysy Aqsý aýdany Qapal aýyldyq okrýg ákimdiginiń bas mamany Vladimir Chepel osyndai pikir bildirdi, dep habarlaidy QazAqparat.
«Taiaýda Memleket basshysy latyn qarpindegi qazaq álipbiine ótýdiń mańyzyn taǵy bir da ret túsindirip ótti. Iaǵni biz mindetti túrde álipbidi qaitadan ózgertýimiz kerek. Árine jańa álipbige kóshý – úlken qadam. Ol úshin aldymen qazaq tilin tolyq meńgerip alý kerek. Jalpy qazaq tilin oqytatyn materialdar men maqalalardyń azdyǵyn baiqaimyn. Máselen, pedagogtar qazaq tili páni boiynsha qaita daiarlaý kýrsynan ótip jatyr. Latyn qarpindegi qazaq álipbiine kóshý – olarǵa ońai bolmaityny anyq. Bárin qaitadan zertteýge týra keledi. Biraq óskeleń urpaqqa bul kúrdeli is emes. Olar jańa baǵdarlama boiynsha oqýdy bastaidy», - dep esepteidi Vladimir Chepel.
Onyń aitýynsha, latyn qarpindegi qazaq álipbiine ótý arqyly jańa tehnologiialardy meńgerý múmkindigi arta túsedi.
«Kompiýter men uialy telefondardy jasap shyǵaratyn memleketter eýropalyq baǵytqa beiimdelgen. Qazir búkil álemde qurylǵyny paidalaný nusqaýlyǵy aǵylshyn tilinde jazylady. Meniń oiymsha, latyn qarpindegi qazaq álipbiine kóshý arqyly aǵylshyn tilin úirený múmkindigin de arttyramyz. Azamattar tildi ońaiyraq meńgerip, tildi zerttei bastaidy», - deidi Vladimir Chepel.
Eske sala ketsek, ótken aida Prezident Qasym-Jomart Toqaev qazaq tili álipbiin latyn grafikasyna kóshirý máselesi boiynsha keńes ótkizgen bolatyn. Jiynda Memleket basshysy keńeste qaralǵan máseleler boiynsha birqatar tapsyrmalar berdi.
Atap aitqanda, álipbi jobasy ǵalymdarmen birge tolyq zerdelenip, Úkimet janyndaǵy Qazaq tili álipbiin latyn grafikasyna kóshirý jónindegi Ulttyq komissiianyń kezekti otyrysynyń qaraýyna engizýdi tapsyrdy.
