Latyn grafikasyna negizdelgen jańa álippe 2020 jyldan bastap engizilýi múmkin, dep xabarlaidy QazAqparat tilshisi.
QR Bilim jáne ǵylym ministri Erlan Saǵadievtiń aitýynsha, mektepterde latyn grafikasyn engizý jumysy eki jyldan keiin bastalady.
«Dál qazir latyn grafikasyn engizý kestesi joq. Degenmen, jospar boiynsha «0»-inshi synyptan bastaimyz. Oǵan eki jyl beriledi. Osy jumysty 2020 jylda bastaimyz dep otyrmyz. Bárimen aqyldasyp, jan-jaqty qarastyryp, álippe daiyndap, eń aldymen osy jumysty jasap, sosyn ary qarai qarastyratyn bolamyz. Sondyqtan biz latyn grafikasyna úlken aprobatsiia jasap, jańa álippeni daiyndaimyz. Odan keiin ony saraptamadan ótkizemiz. Sosyn barlyǵyn muǵalimdermen, mektep diretkorlarymen, sarapshylarmen keńinen talqylaýymyz qajet. Sóitip, naqty bir kesteni qabyldap, latyn grafikasyn asyqpai engizýimiz kerek», - dedi E.Saǵadiev jýrnalisterge bergen suxbatynda.
Ministrdiń aitýynsha, latyndy engizýdi asyqpai bastasaq ta, ol jumysty úzbei júrgizý kerek.
«Árine, asyqpaý qajet. Alaida bir ret bastap ketkennen keiin toqtaýǵa bolmaidy, latynǵa tolyǵymen kóshýimiz kerek. Sondyqtan qazirden bastap barlyq máselelerdi eskergen jón. Latyn álipbiiniń jańa nusqasy jaqsy. Maǵan unady», - dep atap kórsetti E.Saǵadiev.
