Sh.Shaiahmetov atyndaǵy «TIL-QAZYNA» ulttyq ǵylymi-praktikalyqortalyǵynyń uiymdastyrýymen «Latyn grafikaly keńistiktegi jarnama saýattylyǵy» atty respýblikalyq onlain seminar ótti.
Onlain seminarda orfografiialyq top músheleri ázirlegen «Grafikalyq keńistiktegi jarnama» nusqaýlyǵy talqyǵa salyndy. Sarapshy mamandar tarapynan jarnama saýattylyǵyna qatysty ózekti máseleler kóterilip, birqatar usynys pikirler aityldy. «Til-Qazyna» ortalyǵynyń atqarýshy direktory Erbol Tilesh:
- Jarnamanyń saýatty bolǵany jón, saýattylyq emle men pýnktýatsiia erejelerine ǵana emes, mazmunǵa da kerek. Sondyqtan saýattylyq máselesimen qatar jarnama mátininiń ishki mazmunyna da mán berip, ásirese, ulttyq tanymnyń tildik kórinisterin keńinen kórsek igi bolar edi. Jarnama tili jańa álipbige kóshkende túzeler degen úlken úmit bar. Osy onlain seminar aldaǵy orasan jumystardyń basy» - dep atap ótti.
«Ulan» gazetiniń redaktory Juldyz Ábdilda:
- Jurt kitap oqymaýy múmkin, gazet-jýrnalǵa jazylmaýy múmkin, biraq kóshedegi jarnamany mindetti túrde kóredi, kórgen soń oqidy. Vizýal dúnie adamnyń esinde mindetti túrde qalady. Sondyqtan jarnama mátininiń saýatty bolýy óte mańyzdy» ekendigin aita otyryp: «Jarnama berýshilerden saýatty mátin talap etý, qate ketken jaǵdaida túzetýge daiyn bolýyn talap etý, túzetpegen jaǵdaida jaýapkershilikke tartyp, aiyppul salý jaǵyn qarastyrǵan durys» – degen usynys aitty.
Sondai-aq, onlain seminarda jarnama mátinin sózbe-sóz aýdarmai, til zańdylyǵyn saqtai otyryp, tilge jeńil, aitýǵa ońai etip berý jaǵyn ornyqtyrý máselesin kóterdi. A.Baitursynuly atyndaǵy Til bilimi institýtynyń jetekshi ǵylymi qyzmetkeri Ainur Seitbekova kirill jazýymen bolǵan jarnama mátinderindegi kemshilikterdi qaita boldyrmaýdyń joldaryn izdestirip, qoǵamnyń jańa álipbidi jarnama isinde saýatty paidalanýyna jaǵdai jasalý qajettigin, al ondai qajetti qadam jańa emle boiynsha jarnama mátinderiniń birizdi jazylýyna baǵyttalǵan osyndai nusqaýlyqtar men anyqtaǵyshtar ekendigin atap ótti.
Onlain seminarǵa Almaty oblysynyń Til oqý-ádistemelik ortalyǵynyń, Soltústik Qazaqstan Oblysy "Tilderdi oqytý ortalyǵynyń», Aqmola oblystyq oqý-ádistemelik ortalyǵynyń, ShQO Tilderdi damytý jáne úilestirý jumysy bóliminiń, Qaraǵandy oblysynyń tildi damytý jónindegi basqarmasynyń, Qostanai oblysy ákimdiginiń tilderdi damytý basqarmasynyń basshylary men mamandary qatysty.
