Latyn álipbiine kóshý tilimizdiń qurylymdaryna qazirgi jańsaq ketip qalǵan qatelikterdi túzetýdiń amaly. Bul týraly búgin Astanada ótken baspasóz máslihatynda A.Baitursynov atyndaǵy Til ǵylymy institýtynyń bas ǵylymi qyzmetkeri, filologiia ǵylymdarynyń doktory, professor Álimhan Júnisbek málim etti, dep habarlaidy QazAqparat.
«Latyn álipbiine kóshý degendi bir tańbany ekinshi tańbamen almastyra salý dep túsinbeý kerek. Kez kelgen memleket ýaqyt mezgilimen óziniń jazýyn pysyqtap, retke keltirip otyrady. Sondyqtan myna sátti paidalanyp, latyn álipbiine ótý degendi biz qazaq jazýyna reforma jasap alýdyń bastaýy dep túsinýimiz qajet. Nege reforma dep otyrmyz? Osy rette tól dybystarymyzdyń basyn ajyratyp alýdyń, oǵan laiyqty álippeni qurastyrýdyń, bizdiń fonetikalyq ári grammatikalyq tilimizdiń qurylymdaryna qazirgi jańsaq ketip qalǵan qatelikterdi túzetýdiń amaly dep qabyldaý mańyzdy», - dep toqtaldy ǵalym.
Onyń paiymynsha, latyn álipbiine kóshý máselesin tek ǵylymi, lingvistkalyq turǵydan qaraý kerek.
«Jaqynda Parlamentte bir joba tanystyryldy, alaida kópshilik osy joba qabyldanyp qoidy degen oiǵa keldi. Bul máseleni durys túsindirýge shaqyramyn. Ol joba qabyldanǵan joq, ony tek tanystyrdy», - dedi Álimhan Júnisbek.
Esterińizge sala keteiik, 11 qyrkúiekte QR Parlamenti Májilisinde Shaiaxmetov atyndaǵy tilderdi damytýdyń respýblikalyq ortalyǵynyń direktory Erbol Tileshov latyn álipbiiniń biryńǵai nusqasyn tanystyrdy.
.jpg)