Bosqyndar lagerindegi migranttar. Vilniýs, 4 tamyz 2021 jyl.
Latviia úkimeti migranttar tolqynyna bailanysty Belarýspen shekarada tótenshe jaǵdai jariialady. Bul týraly Delfi saity jazdy.
Basylymnyń habarlaýynsha, tótenshe jaǵdai Lýdzensk, Kraslavsk, Aýgshdaýgavsk ólkesi men Daýgavpils qalasynda 11 tamyzda kúshine enip, 10 qarashaǵa deiin sozylmaq.
Shekarashylarǵa shekarany zańsyz kesip ótken adamdardy Belarýske kúshpen qaitarýǵa ruqsat berilgen. Olar arnaiy quraldardy da qoldana alady. Shekarashylarǵa ásker men politsiia kómektesedi.
Memlekettik shekara kúzeti men Azamattyq jáne kóshi-qon isteri jónindegi basqarma osy ýaqyt aralyǵynda migranttarǵa arnap óte qajet zattar men azyq-túlikterdi jeńildetilgen tártippen satyp ala alady.
Osyǵan deiin Latviia ishki ister ministri Mariia Golýbeva zańsyz migranttardyń kóbeiýine bailanysty tótenshe jaǵdai jariialaýdy suraǵan. Resmi derek boiynsha, 6 tamyzdan beri 283 adam shekaradan zańsyz ótken. Jyl basynan beri shekaranyń shyǵys bóliginde saqshylar kóshi-qon zańyn buzǵan 343 adamdy anyqtaǵan.
Memlekettik shekara kúzetiniń bastyǵy Gýntis Pýiats buǵan deiin ortalyqta migranttardy ornalastyratyn oryn qalmaǵanyn aityp, endi kelgenderdi palatkalarǵa jatqyzýǵa májbúr ekenin eskertken.
Osyǵan deiin kórshi Litva da zańsyz migranttar tolqynyna kezikken. Jyl basynan beri Litvada 4 myńnan astam adam ustalǵan. Litva biligi tótenshe jaǵdai jariialap, shekaraǵa temir tikeni bar dýaldar ornata bastady. Vilniýs Belarýsti zańsyz migranttarǵa tosqaýyl qoimai otyr dep aiyptady. Litva SIM 6 tamyzda migranttarǵa Belarýs arqyly Eýroodaqqa ótý qaýipti ekenin eskertken.
