بوسقىندار لاگەرٸندەگٸ ميگرانتتار. ۆيلنيۋس, 4 تامىز 2021 جىل.
لاتۆييا ٷكٸمەتٸ ميگرانتتار تولقىنىنا بايلانىستى بەلارۋسپەن شەكارادا تٶتەنشە جاعداي جارييالادى. بۇل تۋرالى Delfi سايتى جازدى.
باسىلىمنىڭ حابارلاۋىنشا, تٶتەنشە جاعداي لۋدزەنسك, كراسلاۆسك, اۋگشداۋگاۆسك ٶلكەسٸ مەن داۋگاۆپيلس قالاسىندا 11 تامىزدا كٷشٸنە ەنٸپ, 10 قاراشاعا دەيٸن سوزىلماق.
شەكاراشىلارعا شەكارانى زاڭسىز كەسٸپ ٶتكەن ادامداردى بەلارۋسكە كٷشپەن قايتارۋعا رۇقسات بەرٸلگەن. ولار ارنايى قۇرالداردى دا قولدانا الادى. شەكاراشىلارعا ەسكەر مەن پوليتسييا كٶمەكتەسەدٸ.
مەملەكەتتٸك شەكارا كٷزەتٸ مەن ازاماتتىق جەنە كٶشٸ-قون ٸستەرٸ جٶنٸندەگٸ باسقارما وسى ۋاقىت ارالىعىندا ميگرانتتارعا ارناپ ٶتە قاجەت زاتتار مەن ازىق-تٷلٸكتەردٸ جەڭٸلدەتٸلگەن تەرتٸپپەن ساتىپ الا الادى.
وسىعان دەيٸن لاتۆييا ٸشكٸ ٸستەر مينيسترٸ مارييا گولۋبەۆا زاڭسىز ميگرانتتاردىڭ كٶبەيۋٸنە بايلانىستى تٶتەنشە جاعداي جارييالاۋدى سۇراعان. رەسمي دەرەك بويىنشا, 6 تامىزدان بەرٸ 283 ادام شەكارادان زاڭسىز ٶتكەن. جىل باسىنان بەرٸ شەكارانىڭ شىعىس بٶلٸگٸندە ساقشىلار كٶشٸ-قون زاڭىن بۇزعان 343 ادامدى انىقتاعان.
مەملەكەتتٸك شەكارا كٷزەتٸنٸڭ باستىعى گۋنتيس پۋياتس بۇعان دەيٸن ورتالىقتا ميگرانتتاردى ورنالاستىراتىن ورىن قالماعانىن ايتىپ, ەندٸ كەلگەندەردٸ پالاتكالارعا جاتقىزۋعا مەجبٷر ەكەنٸن ەسكەرتكەن.
وسىعان دەيٸن كٶرشٸ ليتۆا دا زاڭسىز ميگرانتتار تولقىنىنا كەزٸككەن. جىل باسىنان بەرٸ ليتۆادا 4 مىڭنان استام ادام ۇستالعان. ليتۆا بيلٸگٸ تٶتەنشە جاعداي جارييالاپ, شەكاراعا تەمٸر تٸكەنٸ بار دۋالدار ورناتا باستادى. ۆيلنيۋس بەلارۋستٸ زاڭسىز ميگرانتتارعا توسقاۋىل قويماي وتىر دەپ ايىپتادى. ليتۆا سٸم 6 تامىزدا ميگرانتتارعا بەلارۋس ارقىلى ەۋرووداققا ٶتۋ قاۋٸپتٸ ەكەنٸن ەسكەرتكەن.
