Politseiler Las-Vegastaǵy qandy qyrǵyn isine qatysty jańa derekterdi anyqtady, - dep habarlaidy CNN.
Telearna málimetinshe, Stiven Peddok qylmys jasaý aldynda Filippindegi bank esepshotyna 100 myń dollardan asa qarajat aýdarǵan. Quqyq qorǵaý organdaryndaǵy derekkózdiń málimetinshe, bul qarajat kimniń atyna aýdarylǵany ázirshe belgisiz. FTB osy másele boiynsha Filippin biligimen jumys istep jatyr eken.
Taǵy bir derek - Peddok tanymal mýzykalyq festival barysynda da atys uiymdastyrǵysy kelgen. The Daily Beast málimetinshe, qyrkúiektiń sońynda ol Las-Vegasta turǵyn úi jaldaǵan, onyń terezeleri Life Is Beautiful mýzykalyq festivaliniń alańyna qarai shyǵyp turǵan. Alaida, boljam boiynsha "qylmyskerdiń" "júikesi tozǵany" nemese 28 qyrkúiekte "josparyn ózgertip, Mandalay Bay qonaqúiine kóship barýdy uiǵarǵan" delinedi.
Eske salaiyq, 1 qazanda Las-Vegastaǵy mýzyka festivalinde atys shyǵyp, 59 adam qaza tapqan, taǵy 500-den asa adam zardap shekken. Festivalde oqiǵa kezinde 22 myńdai adam bolypty.
Qyrǵyn jasaǵannan keiin er adam ózine qol jumsaǵan, al politseiler nómir ishinde segiz dana qarý tapqan. KNTV telearnasy atqyshtyń qarýdy eki platformaǵa ornatqanyn anyqtapty. Sonymen qatar, ol politseilerdiń qalai kelip jatqanyn kamera arqyly kórip otyrǵan.
Las-Vegastaǵy qyrǵyn AQSh tarihynda adam ólimi eń kóp tirkelgen oqiǵa bolyp otyr. Munyń aldynda 2016 jyldyń 12 maýsymynda Orlandoda bolǵan qyrǵyn qaza tapqan adam sany boiynsha eń kóbi edi. Sol kezde Pulse gei-klýbynda 49 adam óltirilip, 53-i jaraqat alǵan bolatyn.
